الحبس عامًا لسائق أوبر المتهم بالتحرش بالفنانة هلا السعيد
قررت محكمة جنح الشيخ زايد، اليوم الاثنين، الحبس لـ سائق أوبر، المتهم بالتحرش بـ الفنانة هلا السعيد على محور الضبعة لمدة عام وكفالة مالية 1000 جنيه.
محاكمة سائق أوبر
وفي الجلسة الماضية، طلب المحامي علي فايز، محامي سائق أوبر أمام هيئة المحكمة، ببراءة موكله من التهمة المنسوبة إليه؛ وذلك تأسيسًا على الدفوع التي تقدم بها.
وأضاف فايز في تصريحات خاصة لـ القاهرة 24، أنه دفع أمام هيئة المحكمة بـ كيدية الاتهام وتلفيقه، وتناقض أقوال شاهد الإثبات الوحيد في تلك الواقعة، وكذلك المجني عليها التي ادعت بالحق المدني
وأردف محامي سائق أوبر: دافعت في جلسة اليوم بأنه ليس هناك جريمة من الأساس، لأن الهدف من هذه الواقعة هو التريند فقط.. والفنانة هلا السعيد قالت في أول فيديو عن الواقعة إنها نزلت من العربية أول ما شافت موكلي بيفك حزام البنطلون.. يعني هنا مافيش فعل فاضح أصلًا.. ولما اتسألت في النيابة إذا كانت شافت آثار بول في الأرض قالت لأ.
وأوضح أن موكله لم يتبول على الأرض، كما أنه حاول أن يطمئن الفنانة هلا السعيد فور نزولها من السيارة، قائلًا: موكلي لو كان عنده سوء نية مكنش وقف بالعربية لمّا المجني عليها اتخضت منه.. بالعكس ده نزل معاها ونزل لها شنطتها وقالها معلش أنا مريض ومبقدرش أتحكم في البول.
وكانت أدلت الفنانة هلا السعيد أمام جهات التحقيق بأقوالها في واقعة اتهامها لـ سائق سيارة أوبر بالتحرش بها في منطقة الشيخ زايد بمحافظة الجيزة.
قضية اتهام سائق أوبر بهتك عرض فتاة التجمع
وحصل القاهرة 24 على نص التحقيقات في قضية اتهام الفنانة هلا السعيد لـ سائق سيارة أوبر بالتحرش بها التي حملت رقم 1040 لسنة 2024 جنح ثان الشيخ زايد، رقم الحصر من المجني عليها هالة السعيد وتعمل ممثلة.
وروت الفنانة هلا السعيد بالتحقيقات كيف تحرش بها سائق أوبر حيث قالت: اللي حصل إن أنا “تاني يوم الواقعة” 22/ 5 / 2024 حوالي الساعة 11:30 الصبح كنت نازلة من بيتي عشان كنت رايحة مشوار وساعتها طلبت أوبر عربية عشان توصلني وفعلًا التطبيق أوبر جبلي عربية ماركة بي واي دي فيراني اللون، واسم القائد السيارة مصطفى وهو ده اللي قبل الريكوست.
وتابعت الفنانة هلا السعيد أمام جهات التحقيق: جالي عند بيتي في سوديك وركبت معاه وساعتها متكلمش معايا خالص ولقيته ماشي وواخد طريق محور الضبعة عشان يوديني وفجأة، وأنا راكبة معاه خلال سبعة دقائق لقيته هدي بالعربية وراح راكن على جنب وساعتها سألته أنت وقفت ليه؟، راح قال لي عشان فيه عطل في العربية وقالي إن الطرمبة سخنت.
وأكملت الفنانة هلا السعيد في اتهامها لـ سائق سيارة أوبر بالتحرش بها: لقيته نزل من العربية وراح لافف ناحية الشنطة وفتح شنطة العربية وساعتها سمعت صوت خبط في شنطة العربية فأنا حسيت أنه هو بيجيب حاجة منها فلفيت عشان أشوف هو بيعمل إيه فلقيت حزام وزرار بنطلونه مفتوح، وكان حاطت ايده علي عضوه الذكري، معرفش هو بيعمل إيه، وأنا ساعتها خوفت منه عشان الطريق كان مقطوع والمشاكل اللي بتحصل اليومين دول.
وأردفت: روحت فاتحة باب العربية ونزلت أجري حوالي 2 متر لورا تقريبًا وساعتها فضلت أشاور للعربيات عشان حد يقف لي بس محدش وقف لي وهو لما لقاني عمال أشاور واستنجد بالناس راح قافل بنطلونه وراح قايل أنتِ خايفة من ايه أنا مش هعملك حاجة اركبي معايا وأنا هوصلك خلاص ومتخافيش أنا مش هعمل لك حاجة.
وأضافت: أنا مردتش أركب معاه، وراح قالي أنا وقفت في الشارع عشان عندي السكر، ولازم كل شوية أفك مياه، وراح قال لي أنتِ فيه حد جايلك قولت له أيوه، فقال لي خلاص أنا هفضل واقف لحد ما الشخص اللي جي يجيلك لقيته راح منزل شنطي من العربية وحطها في الشارع، ولقيته ساعتها فضل واقف حوالي دقيقة وراح واخد بعضه وماشي ولاغي الريكوست على أوبر.
واختتمت الفنانة هلا السعيد قائلة: ساعتها روحت صورت نفسي بموبيلي عشان أثبت الواقعة وبعديها السواق بتاع جاري اللي كان جيلي جه ووصلني للبيت، وبالليل يومها روحت على قسم ثان الشيخ زايد، وعملت المحضر وهناك قالوا لي اطلعي بكرة على النيابة عشان أقول أقوالي.
