غضب أصحاب متلازمة داون بعد سخرية سوزي الأردنية: اللي زيك بيخلوا حياة ولادنا أصعب

أثار مقطع فيديو للبلوجر سوزي الأردنية غضب متابعيها بعد سخريتها من أصحاب متلازمة داون، حيث ظهرت مع خطيبها لتبرير خبر انفصالهما الذي تصدر التريند منذ بضعة أيام، وانتهى بها الأمر بوصفه بأنه من ذوي الاحتياجات الخاصة، قائلة: ده محدش يعتب عليه، ده من الأطفال الداون، وبيقول عليا مريضة نفسيا وهو من الناس الداون اللي عندها حاجة في دماغها، ده من الناس العبيطة.

غضب أصحاب متلازمة داون بعد سخرية سوزي الأردنية

ردت عليها سما رامي سفيرة النوايا الحسنة، وهي من أصحاب متلازمة داون بمقطع فيديو تقول فيه: أنا شوفت الفيديو بتاعك وضحكت عليه، أوي كمان، إنتي بتقولي علينا إحنا عبط؟.

وتابعت قائلة: ده يدل إنك متعلمتيش ولا حتى سمعتي عننا، وعليكي تدوري وتقرأي عشان تعرفي إحنا مين، وأكيد إحنا عند ربنا أحسن منك.

وأرفقت سما رامي مقطع الفيديو خاصتها بتعليق تقول فيه: أصحاب متلازمة داون، متلازمة حب وسعادة، مش عبط ومجانين، أنا باخد حقي وحق أصحابي بالقانون، ودي لازم تتحاسب، إحنا أكيد عند ربنا أحسن منك يا سوزي يا متنمرة.

هجوم على سوزي الأردنية من أهالي أصحاب متلازمة داون

وانهالت التعليقات أيضًا على البلوجر سوزي الأردنية من أهالي أصحاب متلازمة داون، فقالت إحدى الأمهات: أنا شوفت الفيديو بتاعك على الفيسبوك ودورت عليكي عشان أقولك حاجة صغيرة، أنا ابني متلازمة داون 13 سنة، في مدرسة عادية وبيتكلم وبيعرف يقرأ ويكتب عربي وإنجليزي، إنتي يا سوزي تعرفي إيه بقي.

واستطردت حديثها قائلة: إنتي واللي زيك يا سوزي بتخلوا حياة ولادنا أصعب، لأنك بتنشري فكرة مغلوطة عنهم، الزمن اتغير والعلم اتقدم وولادنا بقوا يقدروا يعملوا حاجات كتير، ومش عبط ولا مخهم على قدهم، أنتي بس اللي مش عارفة.

وعلقت سيدة أخرى قائلة: على فكرة الداون اللي بتتنمري عليهم دول ابني منهم اتكرم من رئيس الجمهورية بسبب قصة نجاحه وأول موديل على مستوى الجمهورية من ذوي الاحتياجات الخاصة واتعلق صورته على جميع شاشات العرض بأمر من المحافظ، إنتي مين؟.

وأشارت أخرى إلى صدمتها من تعليق سوزي خاصة أن شقيقتها من ذوي الاحتياجات الخاصة، قائلة: داون ده برقبتك يا سوزي إنتي أقل من أي حد يديكي اعتبار أقسم بالله، الأطفال الداون خصيمتك قدام ربنا يوم القيامة، اعملي حتى اعتبار لأختك، حسبنا الله ونعم الوكيل.