ياسر إدريس يكشف حقيقة الخلاف بين اللجنة الأولمبية ووزارة الرياضة.. وهدف البعثة المصرية في أولمبياد باريس| حوار

كشف المهندس ياسر ادريس رئيس اللجنة الأولمبية المصرية، عن حقيقة الخلاف بين وزارة الرياضة واللجنة الأولمبية المصرية، بالإضافة على هدف البعثة المصرية في أولمبياد باريس، ومكافأة محمد السيد بعد التتويج ببرونزية السلاح.

ياسر إدريس: المنتخب الأولمبي أبدع أمام إسبانيا بعزيمة وإصرار المصريين

لاعب كابوس.. نجم ريال مدريد السابق يتغنى بـ زيزو بعد مواجهة مصر وإسبانيا

حوار ياسر إدريس لـ القاهرة 24

وخلال السطور التالية نستعرض معكم حوار المهندس ياسر إدريس لـ القاهرة 24 من باريس.

ما تعليقك على أول ميدالية لـ مصر في باريس عن طريق محمد السيد؟

• بنحمد ربنا على النتيجة وإنها جت بدري الحمد لله، عشان كان فيه هجوم على البعثة من قبل ما نسافر أصلا لـ باريس.

شايف إيه أسباب الهجوم ده على البعثة المصرية؟

• انت ممكن تنتقد وانت بتنتقد وعندك دراسات فنية، مشكلة الأولمبياد أن بعدها بيبقى فيه انتخابات اتحادات فبيظهر ناس بتستغل الموضوع ده مع بعض المنافسين ضد رؤساء الاتحادات، وكمان بيبقى فيه لجان إلكترونية ودي أسباب الهجوم.

في لاعيبة كتير بتتأثر بالانتقادات اللي بتتقال عليهم، تعليقك إيه؟

• اللاعب تحت ضغط عصبي كبير، وده بيخليه أحيانا يفشل، وأحيانا ينجح، ولكن دي حياتنا، واللي بيحصل ده مش أول مرة، ده عاشر مرة تقريبا، وبيبقى فيه هجوم كبير على اللاعيبة.

شايف بعثة مصر تقدر تحقق كام ميدالية في باريس؟

• وزارة الرياضة كاتبة من 6 لـ 10 ميداليات تقريبا، وأنا كاتب من 7 لـ 11، واللي هيحقق الميداليات 6 أو 7 لاعبين والناس لازم تفهم احنا مسافرين بـ 148 لاعب مؤهل، والدورة الأولمبية فيها 10 آلاف لاعيب، كل اللي هيكسبوا ميداليات هيبقوا 900 بس، وبالتالي فيه حوالي 9 آلاف لاعب مش هيحصلوا على ميداليات.

إيه أبرز الألعاب المرشح لها ميداليات في باريس؟

• 6 اتحادات لهم فرصة كبيرة للحصول على ميداليات، رفع الأثقال والسلاح والرماية والخماسي والتايكوندو والمصارعة.

بصفتك رئيس لـ اتحاد السباحة الناس شايفة أن نتائج السباحين المصريين مش أفضل حاجة؟

• مروان القماش كان بيلعب مصاب وعنده إصابة بـ خلع في الكتف والوتر وده كان خلال السباق، وعندنا سباحة صغيرة لسه بتمتلك خبرات.

الناس قالت إن حضرتك لما صرفت 1000 يورو مكافأة لـ محمد السيد إن هي دي مكافأة البطل الأولمبي، ما تعليقك؟

• 1000 يورو دي مكافأة خاصة وليس مكافأة رسمية، المكافأة الخاصة بـ اللاعب بتكون 2 مليون، وممكن توصل لـ 3 ملايين بفلوس الرعاة.

بنشوف دايما خلاف بين وزارة الرياضة واللجنة الأولمبية، ولكن في باريس في اتحاد بين اللجنة والوزارة؟

• احنا كلنا بنمثل مصر وكلنا واحد، مش جايين نشوف مين أقوى من مين ولا مين أحسن من مين، هناك تعاون بين الوزارة واللجنة، والدكتور أشرف في بينا علاقة صداقة قوية، وسعيد بالتعاون مع الوزارة، والأقوى هي الدولة المصرية.

كلمة أخيرة تقولها للجماهير المصرية؟

• احنا جامدين إن شاء الله ودايما بنتحسن وبنتطور، ودايما إن شاء الله ناجحين ونرجع منصورين.