المتهم بالتعدي على ابنة شقيقه بالهرم: غلطت مع خطيبها السابق وشافتها فرصة تبرر إنها مش بنت
يواصل القاهرة 24، نشر التحقيقات في القضية رقم 17526 لسنة 2024 جنح الهرم، المتهم فيها شخص بمحاولة اغتصاب ابنة شقيقه، مستغلا غياب زوجته عن المنزل ومحاولا التعدي عليها داخل غرفتها بمنطقة الهرم.
واقعة اغتصاب الهرم
س: ما طبيعة علاقتك بالمجني عليها ؟
ج: هي بنت أخويا محمد.
س: هل كانت المجني عليها تقيم برفقتك؟
ج: أيوه هي كانت عايشة عندي في شارع مسجد النور - منشأة البكاري - دايرة الهرم.
س: ما سبب إقامة المجني عليها برفقتك؟
ج: عشان أبوها اتحبس في قضية تعاطي مخدرات ووصاني أخلي بالي منها ومخليهاش تروح تقعد عند أخوها من أمها هيثم.أ.ع.ا، عشان مراته، وفي نفس الوقت محدش من إخواتي كان عايزها تعيش معاه فأنا قلت لها تيجي تعيش عندي كذا مرة وفعلًا جت قعدت عندي.
س: متى بدأت المجني عليها الإقامة بمسكنك؟
ج: من حوالي شهر ونص تقريبًا بس مش فاكر إمتى بالظبط.
س: من كان يقيم برفقتكما؟
ج: مراتي أمينة وأولادي عمر وحمزة.
س: ما كانت طبيعة علاقتكما حال تواجدها بمسكنك؟
ج: هي الأول كانت عادية ومبسوطة بس بعدين بقت متضايقة من قعدتها عندي.
س: ما سبب انزعاج المجني عليها من الإقامة بمسكنك؟
ج: لأنها حست إني خانقها ومش بخليها تنزل لوحدها تروح لصحباتها أو تشتري حاجة أو حتى تشتغل عشان أحافظ عليها ولو هتنزل تروح حتة يا إما بروح معاها أو أخلي مراتي تروح معاها، فهي بقت عايزة تروح تقعد عند أخوها زي الأول عشان كانوا بيسبوها على راحتها.
س: هل سبق لك التعدي على المجني عليها جنسيًا؟
ج: محصلش.
س: هل سبق للمجني عليها اتهامك بالتعدي عليها جنسيًا ومواقعتها بغير رضاها؟
ج: لا مبدأتش تقول عليا الكلام ده غير من يوم 2024/4/12.
س: ما الذي حدث بذلك التاريخ بالضبط؟
ج: اليوم ده أنا لقيت هبة بتديني موبايلها وبتقول لي إن أختها من أمها صابرين، عايزة تكلمني فأنا كلمتها لقيتها بتقول لي بأسلوب تهديد إني أجيب هبة عند هيثم أخوها من غير شوشرة وإلا هيفضحوني فبسألها يفضحوني ليه فقالت لي إنها سمعت اللي حصل وإني بتهجم على هبة وحاولت اغتصبها.
س: ما كان رد فعلك لدى مواجهتك بتلك الاتهامات؟
ج: أنا اتنرفزت وزعقت فيها اللي وقلت: هو إيه اللي انتوا بتقولوه ده وإزاي يطلعوا عليا حاجة زي كده، وقمت واخد مراتي وهبة ورايحين عند هيثم واتخانقت معاهم ونزلت من عندهم وأخدت هبة معايا.
س: إلى أين اصطحبت المجني عليها؟
ج: بصراحة أنا من صدمتي من كلامها مبقيتش عايزها تقعد عندي في البيت وفي نفس الوقت مش عايزها تقعد مع أخوها فأخدتها عند بيت أختي مديحة، عشان تقعد عندها كام يوم.
س: ما قولك فيما شهدت به المجني عليها بتحقيقات النيابة العامة؟
ج: الكلام ده کله کذب ومحصلش.
س: لماذا تدعي عليك المجني عليها؟
ج: أنا عايز أقول إنها أصلا من حوالي سنة كدة غلطت مع خطيبها القديم ونامت معاه ومبقتش بنت وبعدها بفترة سابها وقال إنه مش هيتجوزها طالما غلط معاها، بس هي من كام شهر كده واحد ثاني خطبها وهي لسه مقالتلوش إنها غلطت مع خطيبها القديم ومش عارفه هتقول له إزاي فهي غالبًا شافت إن دي فرصة إنها تبرر له إنها مش بنت إزاي وفي نفس الوقت من غير ما تبان إنها غلطت مع حد أو إنها شمال فهي كده قدامه أنا اغتصبتها فهي مش غلطانة في حاجة.
س: متى قام خطيبها السابق بإقامة علاقة جنسية مع المجني عليها؟
ج: من زمان، من حوالي سنة مثلا.
س: ما تفصيلات ضبطك وعرضك علينا؟
ج: أنا كنت واقف في الورشة عادي لقيت حوالي سبعة من المباحث دخلوا عليا وفتشوني وفتشوا الورشة وسألوني أنا مين فقلت لهم انا إسلام فراحوا أخدوني وركبوني الميكروباص وراحوا بيا القسم.
س متى وأين حدث ذلك؟
ج: الكلام ده حصل يوم 2024/4/27 الساعة 12 صباحًا في ورشتي في شارع أولاد رجب - اللبيني - دايرة الهرم.
س: من كان برفقتك آنذاك؟
ج: الصنايعية بتوعي كانوا معايا.
س: من قام بضبطك بالتحديد؟
ج: حوالي سبعة أفراد من المباحث.
س: ما قولك فيما سطر بمحضر التحريات؟
ج: أنا ممكن أكون ضربت هبة قلمين لما هي قالت أني نمت معاها وخلت صابرين تكلمني وتقول لي كده لكن أنا عمري ما لمستها ولا نمت معاها دي بنت أخويا.
س: ما قولك فيما سطره سالف الذكر بمحضر الضبط؟
ج: هو فعلًا قبض عليا بس الكلام ده حصل يوم 2024/4/27 مش 2024/4/28.
س: هل من علاقة أو خلافات بينك وبين سالف الذكر؟
ج: لا خالص أنا مكنتش أعرفه من قبلها.
س هل لديك أية سوابق؟
ج: لا.
