أبرز تصريحات أحمد بدير بالمسرح المصري: صعبت عليا نفسي بسبب الزيني بركات.. وبخسر اللي مبيحبش بلدي
كشف الفنان أحمد بدير، العديد من أسرار مشواره الفني، ورأيه في دعم الفنانين لـ القضية الفلسطينية، وذلك خلال ندوة تكريمه التي أٌقيمت اليوم بالمهرجان القومي للمسرح المصري.
أبرز تصريحات أحمد بدير في المهرجان القومي للمسرح المصري
- المسرح هو الأساس بالنسبالي، وتكريمي من المهرجان القومي للمسرح المصري، فخر وتتويج لمسيرة أنا سعيد بها بدأت من الصفر لغاية ما أنا قاعد قدامكم.
- أنا مبقللش من السينما أو التليفزيون أو الإذاعة، ولكن المسرح بيجري في الدم وله متعة خاصة، وأول جائزة خدتها في حياتي كانت مسلسل في الإذاعة.
- أنا بهتم بتفاصيل الشخصية سواء صغيرة أو كبيرة في المسرح أو التليفزيون أو السينما، ومتعة الفنان في المسرح هو أنه بيفرح الناس، فالمسرح علاج.
- في مسلسل الزيني بركات، المخرج يحيى العلمي إدى الورق لـ محمود عبد العزيز وبعدها اتصلت عليه 3 مرات، وكل مرة زوجة الفنان محمود عبد العزيز ترد تقول إنه نايم.. ويحيى قال خليه يجيب الورق وأنا هجيب أسوأ ممثل في مصر يعمل الدور ده.. فجابني أنا.
- كنت فاكر إني هصور المسلسل على طول ولقيت إن محدش كلمني، فأنا كلمت أستاذ يحيى العلمي لأني حسيت إن نفسي صعبت عليا، وعيطت وقولتله لو استبدلتني عرفني، قالي إنت متعرفش أن ده ديكور وبياخد وقت؟، وصورت المسلسل.
- أنا فنان يعبر عن الناس ولازم الفنان يكون له وجهة نظر حتى فيه ناس نصحوني إني متكلمش.. وقولتلهم أنا بخسر اللي مبيحبش بلدي.. إنما اللي بيحب بلدي بكسبه.
- في ثورة 30 يونيو الناس كلها نزلت والفنانين كلهم نزلوا.. لأنهم يعبرون عن الناس والبلد.
