مصري يكشف تفاصيل تعرضه للسرقة في تركيا: رجال الأمن قالولي اللي بيضيع هنا مبيرجعش
شارك صانع المحتوى أحمد نبيل متابعيه عبر منصة التيك توك تجربة سفره إلى تركيا التي تعرض فيها لعملية سرقة أمواله داخل غرفته في أحد الفنادق السياحية الشهيرة، وعندما توجه لاتخاذ إجراء قانوني لم ينتبه له أحد.
مواطن مصري يكشف عن تعرضه للسرقة بإحدى فنادق تركيا
قال صانع المحتوى أحمد نبيل الشهير بـ دكتور نوبل، عبر فيديو على حسابه الشخصي على منصة التيك توك إنه تعرض لسرقة أمواله من خزنته الشخصية في غرفة النوم بأحد الفنادق السياحية الشهيرة في تركيا بمنطقة إسطنبول.
وأكد أحمد خلال الفيديو: الفندق اسمه Grand Sirkeci hotel، وسبت فلوسي في الخزنة وقفلتها بـ رقم سري، وبعد ما نزلت ورجعت لقيت فلوسي اتسرقت والخزنة مفتوحة، وصاحبي في الغرفة اللي جنبي حصل معاه نفس الموقف.
وقال أحمد: جيت أبلغ مدير الفندق قال لي أنا راجعت الكاميرات وملقتش حد دخل الغرفة إلا اتنين من طاقم العمل الخدمي للفندق ودول عندهم أمانة مسرقوش حاجة، هات لي أنت إثبات إنك اتسرقت.. اتفضل احنا ماسرقناش حاجة.
صاحب الواقعة: فشل الإجراءات القانونية مع الشرطة في إسطنبول
وأضاف خلال حديثه أنه توجه لاتخاذ الإجراءات القانونية اللازمة مع إحدى المُحامين، واتجه لرجال شرطة السياحة في إسطنبول ودخلنا المركز سألني على جنسيتي وحسيت إني بتهاجم، وبصعوبة وفروا لي مُترجم مُعتمد أقدر أظهر معاه في قسم الشرطة.
وأردف أحمد في الفيديو: أول ما دخلت لضابط الشرطة سألني أنت جاي ليه، قولت له أنا اتسرقت وجاي أجيب حقي، لكن هو رد عليا قالي: لأ اللي بـ يضيع في تركيا مبيرجعش.. احنا بلد كبيرة واللي بـ يضيع عندنا مبيرجعش.
وأشار صانع المحتوى إلى أنه تم التعامل معه داخل قسم الشرطة التركي بطريقة استهزائية والتجاهل بأمره، مؤكدًا: لما قلت له اني عايز أعمل محضر رسمي، كتب اسمي ومواعيد سفري في ورقة، وقال لي تعالى تاني يوم الساعة 9 الصبح اعمل محضر، روحت تاني يوم ملقتش ضابط موجود في القسم.
مصريين في تركيا: كلنا اتسرقنا
وخلال ظهوره في هذا المقطع قاطعه أحد الأفراد من جانبه، قائلًا: أنت اتسرقت؟.. كلنا اتسرقنا، وأوضح أحمد لمتابعيه: حد قاعد جنبي اهو بـ يقولي كلنا اتسرقنا.
واختتم حديثه: الفندق ده نصاب وفيه ناس حرامية وبيتعاملوا مع المصريين بطريقة مش محترمة، فلوسك هتتسرق هناك، وانا استغليت السوشيال ميديا عشان أعرفكم.
