بشرى: زوجي اتخض من ردود الفعل على فرحنا.. وأكون ناجحة في الطلاق أفضل ما أكون فاشلة في الزواج
تحدثت الفنانة بشرى، عن زوجها الحالي خالد نجل زوجة الفنان محمود حميدة، بجانب الحديث عن زيجاتها السابقة، مؤكدة أنها لا تأخذ وقتًا كبيرًا في اتخاذ قرار الزواج.
وقالت بشرى، خلال تصريحات تلفزيونية: محمود حميدة هو اللي ربى خالد من زمان لأن والده توفى، وأنا وخالد كنا زملاء في المدرسة ومحمود حميدة كان دايمًا بيحضر اجتماع أولياء الأمور مع خالد.
وتابعت: خالد شخصية مستقلة جدًا وعايش برا مصر من سنين، وبيفكر بطريقة خارج الصندوق وشبه فكري، أنا على قد ما أنا شرقية ولكن عندي أفكار كتير غربية بحكم نشأتي برا مصر، وهو مواليد بريطانيا زيي، ومركز في شغله، واتخض من ردود الفعل على فرحنا وكل شوية يجي يسألني هو ده عادي كده؟.
وأوضحت بشرى أن والد أبنائها يصد محاولات الإيقاع بينهما منذ الإعلان عن زواجها، قائلة: في تعليقات كانت متوقعة من قبل ما أنزل أي حاجة، وأنا بطلت أشوف التعليقات، وولاد الحلال كتير وبدأوا يكلموا أبو الولاد، ولكن هو الحمد لله راجل محترم جدًا وعاقل ورزين وابن ناس جدًا، والحمد لله هو أول واحد بيكبسهم وبيهزقهم، وأنا بوجه له كل التحية والشكر.
بشرى تتحدث عن زيجاتها السابقة
وعلقت الفنانة بشرى، بشكل ساخر على زيجاتها السابقة، قائلة: كل شخص له شخصيته المستقلة المختلفة عن الآخرين، وكل حاجة حسب الفترة الزمنية والمرحلة العمرية اللي جت فيها، واختيارتي اللي مدمرة حياتي قبل ما أكون أم مختلفة عن اختياراتي بعد ما بقيت أم.
وأضافت: لازم اختار إنسان ظروفه تسمح بأن ده ميعكرش صفو أولادي ويتفهم أن ولادي الأولوية، أنا ست بحب أن العلاقة تكون سوية، مش شرط تبقى بتحبني أوي وبس، أنا كمان لازم أحبك وأديلك زي ما بتديني وإلا هيكون فيه خلل في العلاقة أو في اتنين بيمثلوا على بعض، وأنا بمثل قدام الكاميرا بس، وساعات ببقى عايز حد خارج عن المألوف.
