حسن العدل: المهرجان القومي للمسرح أهم من المهرجانات العالمية.. وبلاش نحبط الجيل الجديد
تحدث الفنان حسن العدل، عن الجيل الحالي بالوسط الفني، بجانب تعليقه على تكريم الفنانين خلال المهرجانات الفنية، مؤكدًا أن التكريم بمثابة شكر للفن عن مسيرته.
وقال حسن العدل، في لقائه مع القاهرة 24: الأجيال اللي طالعة دلوقتي زي الفل، ولكن أهم حاجة نبقى في ضهرهم، هما محتاجين بس أن الناس تديلهم الحرية في التعبير والعمل ويسندوهم وميحبطوهمش، بالعكس أنا شايف فكر جميل ودماغ وأفكار حلوة، مصر بخير.
وتابع حسن العدل، عن تكريم الفنانين بالمهرجانات الفنية: إحنا كلنا مكرمين من عند ربنا، ربنا كرم البني آدم والإنسان لازم يدرك ده، بالتالي يكرم نفسه بـ إيجادته لـ عمله، بالتالي التكريم بيجي على ده، أن متشكرين أنك عملت عملك الصح، وبيلقي الضوء على أي حد بذل جهد علشان يبقى مثل أعلى.
وانتقل حسن العدل، بحديثه لـ المهرجان القومي للمسرح المصري، والذي تم تكريمه به في دورته الحالية، قائلًا: المهرجان القومي للمسرح المصري، أهم من المهرجانات العالمية، لأن مصر لوحدها في كفة والعالم كله في كفة، مصر هي فوق العالم، ده ربنا ذكرها في القرآن والأنبياء عاشوا فيها ووصى عليها سيدنا محمد، مصر حاجة تانية والمهرجان القومي للمسرح حاجة حقيقية.
المهرجان القومي للمسرح المصري
انطلق المهرجان القومي للمسرح المصري، يوم 30 يوليو ويستمر حتى 17 أغسطس الجاري، ويعد المهرجان حدثا فنيا مهما لعرض ملامح المسرح المصري على مدار عام كامل.
