مي عزالدين: الجمهور مبقاش ميال لـ الكوميديا.. وحسن حسني علمني أقول الإفيه
تحدثت الفنانة مي عز الدين، عن عودتها لـ الأعمال الكوميدية من جديد خلال مسرحية زواج اصطناعي، والتي تعرض حاليًا للمرة الثانية في المملكة العربية السعودية، بعد النجاح الكبير الذي حققه العرض الأول.
تصريحات مي عز الدين التليفزيونية
وقالت عز الدين، في تصريحات تليفزيونية: مؤخرًا الضحك بقى صعب، والجمهور نفسه مبقاش ميال لـ الكوميدي، والفنان غصب عنه لما بيعمل حاجة كتير بيبقى عايز يغير، وأنا مبعرفش أمثل كذا حاجة في وقت واحد، وكونك تبقي بطلة مسلسل ويتباع باسمكِ الكلام ده عايز تركيز جدًا في الأول، لأنك داخلة منطقة جديدة عليكِ، وبصراحة أنا اتبسطت أوي في تمثيل التليفزيون.
كما أعربت الفنانة مي عز الدين، عن اشتياقها لـ الفنان الراحل حسن حسني، قائلة: حسن حسني هو اللي علمني يعني إيه أفرش لـ الإفيه وإزاي أقوله، وبعتز بـ أعمالي معاه جدًا وبيوحشني جدًا.
وعن النجوم التي تتمنى العمل معهم مرة أخرى، فقالت مي عز الدين: كل اللي اشتغلت معاهم بحب الشغل معاهم، يعني النجم محمد سعد وتامر حسني والنجمة يسرا، عايزة أشتغل معاهم تاني، لأني بفضّل أشتغل مع ناس أنا بحبها.
أبطال مسرحية زواج اصطناعي
ويشارك في بطولة مسرحية زواج اصطناعي، عدد من نجوم الفن منهم: مي عزالدين، وبيومي فؤاد ودنيا المصري، ومصطفى غريب، وإيمان السيد، وسليمان عيد.
