يسرا اللوزي: مهنة التمثيل مثل القمار سنة ممكن تشتغل كتير وسنة لأ.. ومش بتهمني التصنيفات
أكدت الفنانة يسرا اللوزي، أن التمثيل مثل القمار، موضحة أن لكل إنسان ثوابت في عمله ولكن الفن غير ذلك.
وقالت يسرا اللوزي، خلال تصريحات تليفزيونية: التمثيل زي الطبخة أو القمار لأن مفيهوش ثوابت على عكس المحاسب مثلا، عنده ثوابت وبيقدر يعرف داخله كام، بس احنا مش عارفين هنشتغل إمتى، ممكن يكون عندنا شغل كتير في سنة، وسنة تانية لأ، وشغلتنا هوائية وبناخد قرارات مصيرية هنتحاسب عليها طول الوقت فهو مثل القمار.
وعن التصنيفات وموقفها من تقديم البطولة المطلقة، أوضحت: مش بتهمني التصنيفات ولكن يهمني الدور والبطولة المطلقة بالنسبالي كل حاجة بتيجي بوقتها.
وسبق وأن تحدثت الفنانة يسرا اللوزي، عن أحدث أعمالها السينمائية وهو فيلم البحر الأسود، حيث قالت لـ القاهرة 24: التجربة مفاجأة في وقت أنا كنت مشغولة في تصوير مسلسل سراب، اتبعتلي السيناريو وسمعت إنه فيلم مختلف، والسيناريو صعب يتحكي علشان كده صعب أوي أتكلم عنه، هو فيلم تحسي إنك عايزة تشوفيه والمخرج شاطر جدًا هو ده أول عمل ليه ولكنه عايز يعمل حاجة جديدة ومختلفة وبعد ما قابلته اتطمنت.
وشاركت يسرا اللوزي في رمضان 2024، في أكثر من عمل، مثل مسلسل صلة رحم، بطولة إياد نصار تأليف محمد هشام عبية وإخراج تامر نادي وشارك فيه أسماء أبو اليزيد، محمد جمعة، سلوى محمد علي، عابد عناني، نبيل نور الدين، صفاء الدين.
