نشوى مصطفى لأهالي طلبة الثانوية العامة: بلاش تتعبوا ولادكم نفسيا.. النتيجة مش نهاية المطاف
وجهت الفنانة نشوى مصطفى رسالة إلى أهالي طلاب الثانوية العامة، حيث نصحتهم بأن لا يرهقوا أبنائهم نفسيًا، مؤكدة أن الثانوية العامة ليست نهاية المطاف.
وقالت نشوى مصطفى في تصريحات تليفزيونية: كتر خيركم لتعبكم بس بالراحة شوية على نفسكم وولادكم لأن الثانوية العامة مش نهاية الدنيا، ومش مجموع الثانوية أساس النجاح في الدنيا والأمور كلها بقدر الله.. وربنا ممكن يقدر الأفضل فالبراحة على ولادنا لأني بزعل لما ألاقي أولاد منهارين أو أهاليهم عاملين لهم رعب، وأنتم كده بتتعبوهم نفسيا ولو أي حد حصل له حاجة هنقعد نعيط جمبه والأساس في الحياة تربي ابنك على أنه لو حصل له ظرف في حياته يقف ويقوم تاني ويشد حيله لأنه هياخد درس ويتعلم.
وأضافت: تعبكم كأهالي في ميزان حسانتكم لكن لازم نربي ولادنا أنهم يقعوا ويقوموا أقوى.. والثانوية العامة مش نهاية المطاف والمشوار كبير ومحتاج مجهود كبير.
وتابعت: أنا ابني 30 سنة معظم صحابه حولوا مسارهم لأن معظمهم كانوا خريجين هندسة، وكل ما أقابل حد أقول له عامل إيه في شغلك يقول لي لاء يا طنط أنا بقيت اشتغل كذا.. فكلهم دخلوا هندسة علشان المجموع أو علشان يرضوا بابا وماما.
وأردفت: أنا جبت 73% ومكانتش بذاكر أوي وكنت علمي علوم وأبويا وأمي كانوا عاوزين يدخلوني طب ولكن دخلت تجارة وما اشتغلتش الأربع سنين، وبعتبرهم عطلوا مسيرتي لأن مكانش هو ده اللي عاوزة أدخله.
