هيدي كرم تروي ذكرياتها مع الثانوية العامة: كنت بخرج وبلعب رياضة وبذاكر وبنجح بأرقام كويسة
روت الفنانة هيدي كرم ذكرياتها مع الثانوية العامة، مشيرة إلى أنها كانت تخرج وتمارس الرياضة وتفعل كل شيء، وفي الوقت نفسه تذاكر وتحصل على مجاميع جيدة.
وقالت هيدي كرم في تصريحات تليفزيونية: كنت بعمل كل حاجة بخرج وبتفسح وبلعب رياضة وبذاكر وبنجح بنمر كويسة وشاطرة في تنظيم وقتي.. ولحد دلوقتي الراهبات بيحبوني لأني كنت تلميذة مش مشاغبة وهادية وملتزمة وشاطرة.
وأضافت هيدي كرم: والدتي هي اللي علمتني إدارة الوقت وإزاي أنظم مذاكرتي وكانت بتعمل لي جدول قبل الامتحانات بشهر وتقسم لي الأيام، وجبت 89% ودخلت إعلام، لكني لما اتخرجت من المدرسة كنت 16 سنة يعني صغيرة أوي وكنت منغلقة في مدرسة الراهبات ولما روحت إعلام وجامعة القاهرة لقيت الموضوع فوق قدراتي وحولت تجارة فرنساوي.
وتابعت هيدي كرم: بعد شوية ذاكرت حاجات ليها علاقة بالإعلام وخدت ورش تمثيل لمدة 9 أشهر ودرست الاتنين بشكل حر مش بشكل أكاديمي.
ووجهت هيدي كرم نصيحة للطلبة قائلة: ما تستكتروش مجموعكم لو كبير وادخلوا الكلية اللي أنتم بتحبوها.. وأنت جبت مجموع لأنك ملتزم وشاطر وحصل توفيق لكن دراسة الجامعة بتكون شبه رغباتنا الحقيقية وهترسم جزء كبير من مستقبلنا المهني.
وأكملت: الثانوية مش مقياس لنجاحك ومدى أهميتك كإنسان وشخص لأن كتير أوي من الناس الناجحة على مستوى العالم مكانوش شاطرين في الدراسة، ولذلك هي مش نهاية الدنيا ومش تقييمك كإنسان.
