كيشو لـ القاهرة 24: قلبي وجعني على أمي.. وكان لازم الناس تتأكد عشان دي سمعة بني آدم
تحدث محمد إبراهيم كيشو لاعب منتخب مصر للمصارعة، عن كواليس الأزمة التي تعرضها لها خلال مشاركته في أولمبياد باريس 2024، بعد اتهامه بالتحرش بفتاة فرنسية.
تصريحات كيشو بعد وصوله إلى مصر
وقال كيشو في تصريحات خاصة لـ القاهرة 24: تفاجأت بكلام الناس وإنهم حكموا عليا قبل ظهور الحقيقة، والشرطة الفرنسية أكدت الكلام، ولو كان في شك 1% مكنش زماني وصلت مصر، لكن ربنا كبير وأثبت براءتي.
وأضاف: السفير المصري وعدني برد اعتباري، وهيتم مقاضاة كل من شوه سمعتي، والأدلة والتحاليل أثبتت براءتي وأنا طول الوقت عايش في أوروبا وعارف القوانين، وأخلاقي لا تسمح لي أعمل كده.
وواصل كيشو تصريحاته: أكتر ناس خذلتني هنا في مصر، وكنت شايل هم أمي وكنت حاسس بيها طول الوقت وقلبي وجعني عليها، لكن في ناس كتير تعرفني ومتعرفنيش، وقفت جنبي وقت الأزمة.
وأكمل: التشهير اللي حصلي لم يحدث عندما توجت بالميدالية الأولمبية، لكن لما يحصل مشكلة يتشهر كل دا، كان لازم الناس تتأكد من الكلام لإن دي سمعة بني آدم، وأنا واثق في نفسي وأخلاقي.
واختتم كيشو تصريحاته عن الخسارة في أولمبياد باريس 2024، من دور الستة عشر: الخسارة كانت صعبة، ولم أتوقعها لكنها تدابير ربنا، ولسه عندي بطولات عالم وقارية أعوض أولمبياد باريس.
يذكر أن كيشو ودع منافسات المصارعة في أولمبياد باريس من دور الستة عشر، بعد الخسارة أمام بطل أذربيجان بعدم التكافؤ.
