طلبوا منه يتنازل.. ابنة المعتدى عليه من اللاعب أحمد عادل تكشف كواليس جديدة حول الواقعة
أثارت واقعة اعتداء الكابتن أحمد عادل، لاعب النادي الأهلي السابق، جدلًا عبر منصات التواصل الاجتماعي، تزامنًا مع ظهور ابنة المُعتدي عليه التي تُدعى فرح مصطفى، مؤكدة تفاصيل الحادث وتعرض والدها لكسر شديد.
تفاصيل الواقعة
وقالت فرح في تصريحات خاصة لـ القاهرة 24: والدي لسه خارج من عملية تركيب شرائح و9 مسامير في رجله، نتيجة الكسر اللي تسبب فيه كابتن أحمد عادل.
وعن تفاصيل الواقعة أوضحت: كل ده بسبب خناقة أطفال، وابن أحمد عادل شتم أبويا وأخويا الصغير وعوره في رأسه.
وأردفت: أثناء الخناقة أحمد عادل هو اللي بدأ بالضرب وضرب أبويا في مناخيره خلاه نزف دم كتير، وهدومه كلها اتغرقت دم، وبعد كدة لما أبويا اتعصب، مسكوه 4 ستات، اتنين على اليمين وواحدة على الشمال وواحدة من ضهره، وده عماله جروح في منطقة الرقبة.
هنجيب حقنا بالقانون وإحنا مش غلطانين
وأضافت: هنجيب حقنا بالقانون وإحنا مش غلطانين، أبويا تعبان ومش هنسيب حقه، وتم اتخاذ كل الإجراءات القانونية اللازمة وتم تحرير محضر بـ رقم 387 لـ سنة 2024 جنح مارينا.
وتابعت: أبويا اتبعتله ناس على المستشفى من طرف أحمد عادل، للتحايل بالتنازل عن المحضر عشان الموضوع ينتهي بشكل ودي، لكن أبويا رافض وقال له أنا هسجنه، وهجيب حقى بالقانون.
اعتداء أحمد عادل لاعب الأهلي السابق على أحد الآباء في الساحل
والجدير بالذكر، أنه قد نشرت فتاة تدعى فرح فيديو عبر التيك توك، قائلة: فجأة بابا لقى 4 ستات ماسكين في إيده الاتنين ورجله الشمال ورقبته، وراح أحمد عادل كاسر لـ بابا رجله وضربه، وأشارت الفتاة إلى أنها اتخذت كل الإجراءات القانونية اللازمة وتم تحرير محضر بالواقعة ومازالت التحقيقات الأمنية قائمة.
واختتمت فرح: الموضوع مكنش يستاهل مستحق إنك تيجي تتناقش فيه، أخويا اللي متعور.. دي بلطجة، أنا مشوفتش كدة في حياتي.
ولم تكتفِ الفتاة بنشر هذا الفيديو، بل أضافت منشورًا آخر عبر حسابتها الشخصية على منصات التواصل الاجتماعي، موضحة كل إصابات والدها أثناء ذهابه إلى المستشفى ومحاولات علاجه.
