متصلة لـ أمين الفتوى: زوجي بيعاملني وحش ينفع أعمل له سحر يخليه خاتم في صباعي؟
أجاب الدكتور علي فخر، أمين الفتوى بدار الإفتاء المصرية، على سؤال متصلة تدعى سمر، مفاده، أن أختها غضبت قليلًا عند أهلها ثم عادت إلى زوجها، وأصبح زوجها متعنتًا في معاملته معها،قائلة: كذا حد نصحني أعمل له سحر يخليه زي الخاتم في صباعي هل دا جائز؟.
وقال أمين الفتوى بدار الإفتاء المصرية، خلال تصريحات تليفزيونية، اليوم الأحد: لازم نتحمل، الزوج لازم يتحمل الزوجة، والزوجة لازم تتحمل الزوج، فلازم إحنا الاثنين نتحمل بعض، يعني لو إن زوجتي عملت حاجة أو تغيرت، نفسها تغيرت، فبقت يعني مهملة شوية حتى ولو على حتى لو بتتعمد، ما فيش مانع ممكن نتحملها شوية ونفهمها إن اللي بيحصل ده مش صح وهكذا.
حكم عمل سحر للزوج
وواصل: طب الزوج أصبح متعنت مع زوجته شوية، وكان كويس ولكن أصبح متعنت شوية يعني، بيعاقبها، ما فيش مانع هي تتحمل شوية ومع ذلك إيه نفهمه إنه لا، ما يصحش كده ولازم يكون في معاملة طيبة بينكم والمودة والرحمة، ولكن هل إنه أحد الزوجين لو عامل الآخر معاملة سيئة مباشرة، ننفر؟ لا.
واستكمل: ليه؟ لأن لو عملنا كده، لا تستقيم البيوت، كل البيوت فيها مشاكل وكل البيوت فيها زوج متعنت وفيها زوجة مهملة شوية وفي كذا وفي حاجات كتير قوي.
واستطرد أمين الفتوى: طيب حد نصحها، هتروحي الواحد يخليه لك خاتم في إصبعك، ده دجل وسحر، وسيدنا النبي صلى الله عليه وسلم حذرنا من أن نلجأ إلى الساحر، وإذا لجأنا إلى الساحر، إحنا بنعرض ديننا للخطر، يا الله، بنعرض نفسنا للخطر الجسيم، فلا، نحن لا نلجأ إلى الساحر، ولا نلتفت إلى هذا الكلام، واللي ينصح هذه النصيحة بيضر، مش بينفع، ولازم نعتقد كده إن الأمور لا تتغير إلا بإرادة الله سبحانه وتعالى، إنما السحر لا يستطيع أن يغير الأمر.
واختتم: وعلى هذا فهي عليها أن تلتزم وتلجأ إلى الله سبحانه وتعالى، تدعو ربنا كتير، أن ربنا يصلح ما بينها وبين زوجها، وهي تقوم على هذا الأمر، هي يكون لها دور كبير في أن تصلح ما بينها وبين زوجها، وتشعره بأنها قد تغيرت للأحسن بهذا التغير.. إن شاء الله ربنا سبحانه وتعالى يهدي قلبه ويتغير معه للأحسن.
