عمر عصر: الاتحادات بتاعتنا هي السبب أننا مناخدش ميدالية.. وابن المدرب ساعات بينسى يبعت أسامينا
تحدث عمر عصر لاعب منتخب مصر لتنس الطاولة عقب تحقيقه المركز الخامس في دورة الألعاب الأولمبية الصيفية باريس 2024.
تصريحات عمر عصر لاعب منتخب مصر لتنس الطاولة
وقال عمر عصر في تصريحات تليفزيونية: كنا رايحين معسكر في ألمانيا يوم 15 يونيو والاتحاد لغاه يوم 12 دون إيجاد مكان للتدريب.
وأضاف: مش عاوز الناس تروح لناحية تانية غير الفرحة بإنجاز سارة سمير وأحمد الجندي، لكن بنطالب أن اللي يكون موجود في الاتحاد يكون بروفيشنال؛ لأن أنا مش ببقا عارف خطة السنة دي إي
وأشار عمر عصر: رئيس الاتحاد معتز عاشور عيّن أخوه ماجد عاشور مدير فني للمنتخب.. فلو فيه مشكلة مع المدرب أخوه بيبقى الخصم والحكم في نفس الوقت.. وابن المدرب هو مسؤول المراسلات فبينسى يبعت أسامينا في البطولات الخارجية.
واستمر عمر عصر في تصريحاته: اجتمعنا بوزير الرياضة ووضحناله أمور مهمة وقولناله أن الاتحادات بتاعتنا هي اللي بتقف قدامنا والسبب أننا مناخدش ميدالية وذلك رغم دعم الدولة للاتحادات دي حتى لو بطريقة غير مباشرة ومصرفوش جنيه واحد على اللاعبين المؤهلين للأولمبياد والمفروض أن دي الفترة اللي بتجيب فيها آخر الإعداد للأولمبياد.
وأكد: قدّمنا لوزير الرياضة ملف كامل عن إجمالي المصروفات التي تحملها اللاعبين خلال آخر سنة كاملة، وهو رقم خيالي من أجل الحفاظ على الآمال في الحصول على ميدالية أولمبية، وبعدما علم الوزير بذلك أمر بإرسال مفتش في اليوم التالي للاتحاد المصري لتنس الطاولة لمراجعة المستندات.
وزاد عمر عصر في تصريحاته: هذا المفتش تواصل معي وقال لي بالنص “أنتم كنتم في معسكر بألمانيا لمدة 12 يوم وتكلفة اليوم 225 دولار هل الكلام دا حقيقي فـ قولتله أنا اليوم دا كنت في البيت مش لاقي تمرين لأن المعسكر اتلغى فـ ازاي يكون فيه فاتورة لمعسكر اتلغى؟”.
وأتم عمر عصر تصريحاته، قائلًا: المركز الخامس في الأولمبياد كان محبط ليا. لأني كنت أتمنى تحقيق ميدالية، واحنا بناخد تنس الطاولة بشكل احترافي واللي فاز بالميدالية الفضية أنا كنت كسبته من 3 شهور في كأس العالم وفزت عليه تاني من 5 شهور في بطولة العالم واللعبة ممكن نحقق فيها ميدالية بسهولة وهنوصل ان شاء الله.
