أبرز تصريحات نيللي كريم: أنا شخصية مزاجية وساعات ببقى مش عايزة أشتغل.. ونفسي أقدم عمل استعراضي
حلت الفنانة نيللي كريم، ضيفة على الإعلامي إبراهيم عبد الجواد، في مهرجان العلمين الجديدة، وتحدثت خلال اللقاء عن تفاصيل عملها مع الفنان كريم عبد العزيز، في مسرحية سندباد التي يتم عرضها حاليًا ضمن فعاليات المهرجان، بجانب الكشف عن أمنيتها في تقديم عمل استعراضي.
أبرز تصريحات نيللي كريم في مهرجان العلمين
- سندباد أول مسرحية ليا، ومسرح الباليه مختلف عن مسرح التمثيل تمامًا.
- مبسوطة أني بمثل مسرح مع الفنان الكبير اللي كل الناس بتحبه وأنا شخصيًا بحبه جدًا كريم عبد العزيز.
- المسرح مختلف أنك بتشوف نفس الناس كل يوم، وكل يوم بيكون في تجدد طول الوقت ودايمًا للأحسن.
- المسرح لو أنت حبيته مش هتخاف منه، بس طبعًا الغلط الكتير مش مستحب.
- أنا بحب العروض الاستعراضية وكنت عايزة لو عملت مسرح تاني يكون ميوزيكال، أو فيلم استعراضي، ولكن ده مكلف شوية.
- بحب أشتغل مع المخرجين الجداد لأن بيبقى عندهم حماس وعايزين يعملوا حاجة حلوة، وكلنا كنا جداد في يوم من الأيام.
- أنا بحب أجرب أشتغل مع ناس جديدة وأعمل تجارب مختلفة.
- أنا عملت كل حاجة كوميدي وتراجيدي وأكشن وصعيدي وتريخي، وعن السجن وعن الإدمان، على حسب مزاجي.
- أنا شخصية مزاجية جدًا وساعات ببقى مش عايزة اشتغل ومحتاجة راحة.
- يمكن بقالي كتير معملتش أفلام رومانسية لأنها عميقة.
- لما بفتح السوشيال ميديا بحس أننا محتاجين نقدم حاجات مافيهاش مشاكل ولا عنف.
- أنا مش مدمنة سوشيال ميديا، ولا بحب التكنولوجيا، أنا شخص بتاع جوابات وبحب الحاجات القديمة.
- مبحبش خناقات جمهور الأهلي والزمالك على السوشيال ميديا، بحس أنها حرب أهلية.
- تعاون المتحدة مع السعودية مفيد جدًا، وبشكرهم على التعاون وخروج عرض السندباد، خاصة أنه عرض متكامل وأنه تشجع الفن العربي دي حاجة جميلة أوي.
- عندنا مواهب كتير حلوة على مستوى الوطن العربي، اللي كان ناقصنا الإنتاج.
- عملنا 20 عرضا لـ السندباد في السعودية، ولما جينا مصر التذاكر خلصت ومحجوزة كل الأيام، ومن هنا حسيت أن المسرحية نجحت على مستوى الوطن العربي.
- في كيميا بيني وبين كريم عبد العزيز كبيرة، وهو مركز في شغله جدًا ولكن عنده حس كوميدي، بحبه وبحترمه وإن شاء الله إحنا مع بعض في حاجات تانية مختلفة.
