علاء الدين مصطفى: فيلم البحر الأسود من أصعب تجارب حياتي.. وقولت هبطل إخراج بعد ما أخلصه
كشف المخرج علاء الدين مصطفى، تفاصيل أولى تجاربه الإخراجية فيلم البحر الأسود، بطولة الفنانة يسرا اللوزي، والفنان خالد الصاوي.
وقال علاء الدين مصطفى، في لقائه مع القاهرة 24: فيلم البحر الأسود من أصعب التجارب اللي مريت بيها في حياتي، خاصة أني في أول الفيلم قولت هبطل خالص بعد كده، لأن التجربة كانت صعبة جدًا والفيلم مكنش سهل أنه يطلع للجمهور، وحاولت ألف على منتجين من البداية وده مش سهل أنه يبقى موجود خالص، ولكن الحمد لله قدرنا وصورنا اللي عايزينه الحمد لله.
وتابع علاء الدين مصطفى: فكرة الفيروس في الفيلم مش زي كورونا خالص ومش بينتقل بالعين هو مرض لو جه في العين بتبقى كارثة وحظر تجوال ولو نزلت الشارع هتموت، ومتوقع أن الجمهور يستقبل الفيلم بشكل كبير ويقدر المجهود.
يسرا اللوزي تكشف تفاصيل فيلم البحر الأسود
وسبق وأن كشفت الفنانة يسرا اللوزي، تفاصيل فيلم البحر الأسود، قائلة: هو فيلم فانتازيا ودراما في اللازمان واللامكان، هو مش فيلم تقليدي له بداية ووسط ونهاية.. هو قصة وحبكة ولكن مش سهل تتحكي، أنا مش عارفة أحكيه لجوزي، كل واحد لما يتفرج عليه هيتخله من منظوره، ولما قعدت مع المخرج علاء الدين مصطفى اتطمنت أكتر، لأنه فعلًا شاطر وله رؤية وطموح، وعارف هو بيعمل إيه ومتمكن من أدواته.
فيلم البحر الأسود
وفيلم البحر الأسود من بطولة خالد الصاوي، يسرا اللوزي، ثراء جبيل، حمزة العيلي، أحمد ماجد، يوسف عمر، محمد الجداوي، كريم علي، بسنت أبو باشا وهو من إنتاج شركة archive media production وتأليف وإخراج علاء الدين مصطفى.
