بسبب مصاريف البيت.. زوجة تستغيث من تهديدات زوجها ومحاولات خطفه لابنها | تفاصيل
انتشر فيديو على منصة فيسبوك للتواصل الاجتماعي، لـ رجل يضرب حماه ويسبه، مما جعل ابنته وهي زوجة المُعتدي للاستغاثة بشأن تعرضها للعنف من قبل زوجها بعد أن اعتدى عليها وعلى والدها بالضرب والسب والسرقة.
بسبب مصاريف البيت.. زوجة تستغيث من تهديدات زوجها
واستغاثت السيدة فيروز سعد التي تبلغ من العمر 24 عامًا وتحمل رضيعا عمره 5 شهور ونصف، من تعرضها للعنف والمعاملة غير الأخلاقية من قبل زوجها بعد أن اعتدى عليها بالضرب والسب والسرقة، لمجرد أنها تطالبه بالإنفاق على منزله وأسرته وطفله.
وقالت فيروز خلال حديثها مع القاهرة 24: أنا حاليًا مُهددة بالقتل من جوزي، مش عايز يطلقني.. وقال لي إنه هيطلقني ببلاش بدون حقوق النفقة والمؤخر، هو شاتمني بـ كلام غير محترم، ولما طلبت منه مصاريف لابنه شتمني ورفض، واضطريت إني أرفع قضية طلاق بعد اتخاذه لقرار إرسال إنذار الطاعة.. لكن لسة ماخدتش حكم.
وتعمد زوجها بـ الهجوم عليها في منزلها منذ 15 يومًا لخطف ابنها الرضيع منها وسرقة الذهب الخاص بها: جه وكان هيخطف ابني غصب عني وسرق دهبي اللي أنا جيباه من شغلي قبل ما أشوفه، يساوي حوالي 25 جرام، ده بعد ما ضرب أبويا اللي عنده 74 سنة.
الزوجة: يتيمة وعايشة مع أهلي بـ التبني.. وعايزة اتطلق من زوجي
وأردفت فيروز تفاصيل زواجها قائلة: من البداية أنا يتيمة وكنت عايشة في ملجأ، وأهلي تبنوني وأنا رضيعة وعمري شهور، اتربيت وكبرت معاهم في إسكندرية ولما بقى عمري 20 سنة عرفت انهم مش أهلي، وبدأوا يزهقوا مني وبدأوا يطردوني ويقولولي امشي مش عايزينك، وكل مرة كنت بنطرد كنت بيبقى معايا فلوس من شغلي وبعرف اتصرف.
وأضافت: آخر مرة مكنش معايا فلوس.. ودي كانت من سنة، طردوني نص الليل وقتها نزلت منشور استغاثة على الفيس بوك ووقتها في حد دخل كلمني اسمه كريم.. وقالي أروح شرم الشيخ وهو هيوفر لي مكان أقعد فيه بمكان شغله في قرية سياحية، ولما وصلت عرض عليا الزواج وأنا كنت طبعًا زهقت إني كل شوية أنطرد عايزة اتجوز يبقى ليا راجل وسند وبيت وعيلة المهم وافقت وجه اتقدم لأهلي بـ التبني في إسكندرية.
بعد 22 يوما زواج.. تهديد وعنف وخطف وسرقة
ورويت فيروز: وقتها أهلي وافقوا لأنه أقنعهم أنه عنده شقة ملك في بيت أمه، والكلام ده طلع كذب.. وقال هنتجوز مفروش في شرم الشيخ عشان هو شغله هناك وهـ يمضي على القايمة لكن مش هيجيب جهاز ولا عفش، وجالي قبل الفرح بـ يوم واحنا بنجيب الفستان قال لي مش همضي القايمة، يا كدا يا مفيش فرح، بعدين للأسف وافقت واتجوزنا يوم 10 يونيو 2023، وجه بعد الفرح بـ 4 أيام طلب مني أشتغل وأصرف معاه بالنص إيجار وأكل ومياه ونور وأنا رفضت وقلت له مقلتش من الاول ليه.
وقالت: مكنتش هعرف أرجع إسكندرية بعد رابع يوم جواز، وصبرت معاه فى وهو كان بخيل جدًا ومبيصرفش على البيت.. عشت معاه 22 يوم لحد ما ضربني بالعربية بتاعته عشان طلبت منه أكل وهو رافض يأكلني، وقال لي لو عايزة ترجعي اسكندرية ارجعي.
الزوجة: عرفت اني حامل ومكنش عايز يسجل الطفل بـ اسمه
وأوضحت خلال التفاصيل: لما رجعت إسكندرية عرفت إني حامل وكان عايزني أنزل الجنين، وقال لي أنا مطلبتش منك عيال، نزليه لكن طبعًا أنا منزلتوش لأنه حرام وكملت ولما جه إسكندرية روحت له أنا ووالدي، لكن ضربه وضربني في بطني عشان يسقطني وهو عارف إني حامل في الشهر السادس وجالي نزيف.
واختتمت: وقت الولادة كان رافض تسجيل الطفل على اسمه، وبالعافية وافق يبعتلي البطاقة بتاعته ورحت سجلت ابني بيها بعد ولادتي اللي أنا دفعت مصاريفها كلها لوحدي، هو حاليًا بيهددني ومش عايز يطلقني ومش عايز يديني حقوقي وحقوق ابني.
