لا تاريخ ولا جغرافيا.. تامر أمين يقترح استبدال المواد الأدبية بالتسويق والبيع
شن الإعلامي تامر أمين، هجومًا حادًا على نظام الثانوية العامة، قائلا: آن الأوان لتغيير المناهج، خاصة مناهج الأدبي فهي مشكلة المشاكل، وقولولى إيه فى المواد الأدبية بمرحلة الثانوية العامة مفيد هذه الأيام؟!، ايه الاستفادة إن طالب الثانوية العامة يدرس تاريخ، ومحدش يقولي يا نهار أسود أنت مش عايز تاريخ، بلاش الشعارات، خلونا في اللى بيأكل عيش ويجيب تقدم.
تامر أمين يقترح تغيير نظام الثانوية العامة
وأضاف تامر أمين خلال تصريحات تلفزيونية: الطالب يدرس جغرافيا ليه، يدرس فلسفة ومنطق ليه، هيعمل بيهم ايه وايه الاستفادة اللى هتعود عليه عند الدخول إلى الكلية أو سوق عمل، آخره يحاول يدور على شغلانة مدرس فلسفة أو تاريخ، المواد دى درسوها زى ما أنتم عايزين فى ابتدائى وإعدادى، ادوا جرعة وحصيلة أساسية، وكفاية قوى كده تاريخه خلوه يعرف مستقبله.
وواصل: المرحلة الثانوية أنت بتجهز الطالب لسوق العمل، فلا تدرس له تاريخ وجغرافيا، وعلم نفس وفلسفة ومنطق مش هيعمل بيهم حاجة، بالدليل إن 70 و80% من الطلاب بيهربوا من الأدبي للعلمي، وبدلا من فصول وأقسام الأدبي وتخرج الطلبة، مش متعلمين كويس ولا مستفيدين حاجة، نستبدل المواد دي في المرحلة الثانوية بمواد يستفيدوا بيها.
وتابع: استبدل المواد الأدبية بمادة اسمها التسويق ماركتينج، ومادة التنمية البشرية والموارد البشرية ومادة اسمها الاتصال وعلوم الاتصال واعمل الحاجات المهمة جدا في سوق العمل حاليا زي البيع وغيره، دا أنا حتى قولت ان مش شايف فايدة لتدريس اللغات.
