حسين الشحات يكشف كواليس حديثه مع الشيبي في مباراة الأهلي وبيراميدز الأخيرة
كشف حسين الشحات لاعب النادي الأهلي عن كواليس حديثه مع محمد الشيبي لاعب نادي بيراميدز في مباراة الفريقين الأخيرة في بطولة الدوري المصري الممتاز 2023-2024.
تصريحات حسين الشحات
وقال حسين الشحات في تصريحات تليفزيونية: لم أتوقع عدم مشاركة محمد الشيبي في مباراة الأهلي وبيراميدز بسبب أزمتنا، وكنت مركز في الملعب بس وإن أقدر أكسب فريقي.
وواصل: وكنت متأكد إن مفيش أي مشكلة هتحصل بينا في الملعب، والمعد النفسي أتكلم معايا قبل مباراة بيراميدز بسبب مشكلة الشيبي، والحمد لله إني خرجت سليم من المباراة، والشيبي كان داخل يؤذيني، وقولتله: مش عشان بيني وبينك مشكلة تبقى عايز تبطلني كورة.
وأكمل الشحات بشأن بداية الأزمة مع الشيبي: قعدت أسبوع أو 10 أيام مش بنام بسبب الموقف اللي حصل بيني وبين الشيبي، لومت نفسي جدا لأن ده مش حسين ولما روحت البيت وشوفت الموقف تضايقت من نفسي لأن دي مش شخصيتي ولا ينفع أوصل لكده، ولا هعمل الموقف ده بعد كده إن شاء الله.
وأضاف: اعتذرلته مرة واتنين وتلاتة، وأكيد هو متأثر نفسيا، وبعتذرله تاني على الموقف ده، وأي حد بيغلط وأتمنى ربنا يسامحني على اللي حصل ده، أنا أصلا مش بشتم وزعلان من نفسي، وده غلط أنا عملته وتوبت لـ ربنا وأتمنى ربنا يغفرلي.
وأتم الشحات تصريحاته قائلا: مكنتش متخيل إن الموضوع بيني وبين الشيبي يوصل للمحاكم، واتصدمت طبعا، وقولت هو شايف كده والله أعلم حد سخنه ولا إيه، وكل واحد حر، واللي حصل بتاع ربنا والحمد لله واتعملت من القصة دي، وأكيد مش هغلط نفس الغلطة دي تاني.
