عزيز الشافعي: شيرين كانت مجبرة تنزل أغاني.. وأتمنى حد كبير يحل أزمتها مع روتانا
كشف الملحن عزيز الشافعي، كواليس أغنيتي بتمنى أنساك، واللي يقابل حبيبي لـ شيرين عبد الوهاب، وذلك بعد حذفهما من شركة روتانا للصوتيات والمرئيات الخاصة بالأغاني من موقع يوتيوب، بعدما طرحتهما شيرين أمس.
وأوضح عزيز الشافعي في مقطع فيديو نشره عبر حسابه الشخصي بموقع إنستجرام، أنه يتمنى أن يتم طرح أغاني شيرين عبد الوهاب، التي هي من ألحانه بشكل أفضل: كنت بتمنى الأغاني تنزل بطريقة أحسن، والاستعجال في تنزيل الأغاني حاجة ضايقتني ولكن شيرين كانت مجبرة عليه وأنا بدعمها مهما حصل، الاستعجال خلى أغنية بتنمى أنساك تنزل وهي لسه مخلصتش، والمهم أننا نسمع شيرين في كل حتة، والجمهور استقبل الأغاني بشكل رائع، ويا رب شيرين تقدر تعدي الأزمة دي زي ما عدت كتير.
وبشأن أزمة شيرين مع شركة روتانا، قال عزيز الشافعي: أنا فرحان بحماس شيرين وفرحان بشجاعتها، ومُقدر أنها ممكن تكون غلطت، وأتمنى يكون فيه حد كبير في المزيكا والقانون يحل الإشكالية دي ويدي كل واحد حقه ويخلي شيرين تشتغل، وتخرج من مشاكلها الخاصة وتكلمنا في الفن، اللغة اللي بنحب شيرين فيها.
وكشف عزيز الشافعي كواليس أغاني شيرين عبد الوهاب، قائلا: أغنية اللي يقابل حبيبي كلمات تامر حسين، أنا وتامر قعدنا أكتر من سنة علشان الأغنية دي تتعمل بالشكل ده وشيرين اللي تغنيها، وفرحانين وإحنا سامعينها بصوت شيرين عبد الوهاب ومنتمناش أحسن من كده، وكانت المفروض الأغنية تنزل بشكل أحسن من كده.
وواصل الشافعي: أغنية بتمنى أنساك كلامي ولحني وتوزيع توما، مجهود كبير من شيرين غنتها 3 مرات، ومجهود كبير من توما في كل تفصيلة، أنا مش قادر أقولكم قد إيه فرحان وأنا سامعها بصوت شيرين وزعلت أنها وقفت على اليوتيوب.
