عبده الوزير: احترمت نفسي وبعدت عن الفن 14 سنة.. ومبقاش فيه أخلاق حتى في رمضان
كشف الفنان عبده الوزير سبب غيابه عن الفن لمدة 14 عاما، قائلا إنه أقدم على اتخاذ تلك الخطوة بعد انعدام القيم في بعض الأعمال الفنية على حد تعبيره، ولم يقبل المشاركة في أعمال فنية يظهر بها عنف وقتل.
الفنان عبده الوزير يكشف سبب ابتعاده عن الفن
وقال عبده الوزير في أول ظهور له بعد ابتعاده عن الفن 14 عاما، خلال لقائه مع القاهرة 24: مفيش سبب بعينه بعدني عن الفن، ولما بنيجي نتكلم في الأعمال الفنية مبنفصلش حاجة من حاجة، والمجتمع المصري أو أي مجتمع في الدنيا عبارة عن سلسلة بتوصل لبعض وهي العدل في كل شيء وده اللي ربنا قال عليه، وأنا ملقتش العدل والصح والتربية اللي اتربيت عليها والدراسة اللي درستها على يد العظماء، اللي علموني يعني إيه احترام الفن والجمهور وإن وأنت قاعد مع أسرتك قدام التليفزيون متلاقيش حاجة تخجل منها.
وأضاف عبده الوزير: أنا فجأة ملقتش العدل وقيم الأعمال الفنية، ولما ملقتش الحاجات دي مارست حياتي وبشوف مسرح وسينما وكل حاجة بتتعرض على التليفزيون، أنا مش زعلان من الدنيا، بس بشوف وبحترم نفسي أكتر.
وأوضح الوزير، أنه لا توجد شخصية بعينها كانت السبب في ابتعاده عن الفن، قائلًا: مفيش حد كان قاصد أني أبتعد عن التليفزيون، والموضوع كان اختلاف في وجهات النظر، وفي التوقيت ده طلع جيل جديد من المنتجين والمخرجين والماكيير ومهندسين الديكور ومديرين التصوير، وطلع جيل شباب مبهر في التكنيك فقط، لكن هما بيقدموا إيه ده موضوع تاني.
وواصل: الجيل الجديد من الفنانيين إحنا مالناش علاقة بيه خالص، والجيل بتاعنا كلهم قعدوا، وفي شوية منهم عرفوا يتأقلموا وحقهم، ولكن الجيل بتاعنا مبيعرفش يرفع سماعة التليفون ويقول إنت أحسن مخرج علشان يشتغل ولا هيعرف.
وأعرب عبده الوزير، عن استيائه بسبب مناقشة زنا المحارم في عمل فني تم عرضه في شهر رمضان، قائلًا: المبدأ لا يجزأ، وعلمونا في الأكاديمية أن الفن لا يمكن أن يقوم له قائمة وسط جو من الفوضى والعبث، فالفن هو نظام وجمال قائم على التناسب، وإحنا دلوقتي بنشوف قتل ومخدرات وبلطجة في المسلسلات والأفلام، وبنشوف زنا محارم في مسلسلات الشهر الكريم، حد يرضى إنه يشوف ده في بيته؟ إحنا نشارك في ده؟ يبقى احترم نفسي بهدوء كده لغاية ما الصورة تتضح.
