نيكول سابا عن انتقادات إطلالتها في الكت كاتي: مش هنلبس كُم وصوف على البحر.. والأغنية فيها فرفشة
كشفت الفنانة نيكول سابا كواليس أغنيتها الكت كاتي والتي طرحتها مؤخرًا، وردت على انتقادات البعض لإطلالتها التي وصفوها بالجريئة في الفيديو كليب.
وقالت نيكول سابا عن كواليس الأغنية في لقائها مع القاهرة 24، إنها تحب تقديم أغاني فريش ومميزة خاصة في موسم الصيف، مشيرة إلى أن الجيل الجديد يحب أن يغلب على طابع الأغاني الإفيه وخفة الدم عكس السابق.
وأشارت نيكول سابا إلى أن اسم الكت كاتي ليس غريبًا وأنها تسمع هذه الكلمة كثيرًا خاصة بالأفلام المصرية وهي تعني الملابس الكت، مضيفة أنها لم تلتفت لاسم الأغنية بقدر ما لفت انتباهها الحالة النفسية التي تقدمها الأغنية.
وأضافت نيكول سابا: اتفاجئت أن التركيز على اسم الأغنية، ولما سمعتها للمقربين مني كلهم فهموا معناها، واللي مفهمش غير مصريين، وأنا بعتبر نفسي مصرية بجانب أن دي شغلتي في التمثيل لأن ضروري أكون عارفة الإفيهات وطريقة إلقائها.
وتابعت نيكول سابا: صورنا الأغنية في بيروت، وعملت ردود فعل إيجابية وكذلك بوستر الأغنية وحسيت أنها بسيطة وفي نفس الوقت مميزة.
نيكول سابا ترد على انتقادات إطلالتها في الكت كاتي
وعن الانتقادات التي تعرضت لها قالت: مبقتش أحب أقرأ التعليقات لأن الناس بقيت أوفر ويمكن علشان يستفزوكي وكل الكومنتات بتكون شبه بعض، والقليل اللي ممكن يقول انتقد صح على حاجة أقدر أركز فيها.
وواصلت: لما حد يقول أوفر، إيه هو اللي أوفر؟ إحنا بنصور على البحر، يعني هنلبس كُم وصوف وننزل على البحر! إحنا مش بنشوف الناس بتلبس إيه على البحر؟ ده أقل حاجة حد يقول عليها كلمة.
وأكملت نيكول سابا: أنا دايما أعمالي بتعمل جدل حتى لو مقلتش كلام، وده دليل أنك مش بتعدي مرور الكرام، وفيه ناس بيقولوا إن الناس مركزة معاكي وبتستنى شغلك وبتستفزيهم لأنك عاملة حاجة متكاملة على بعضها فلازم يدورا على حاجة.
وأردفت: الأغنية فيها فرفشة ولذاذة وريأكشنات طول الوقت، على عكس ما كله بيطلع زي اللوح ومفيش روح وأنا بالعكس بتحسي بطاقة من جوه بتعكس اللي بره، وأنا طبيعية برأكشناتي ومش متصنعة.
