طارق حامد: عانيت من ظروف صعبة وقررت ترك الكرة والسفر إلى لبنان
كشف طارق حامد، لاعب الفريق الأول لكرة القدم بنادي ضمك السعودي، كواليس بداية مشواره في عالم كرة القدم، والصعوبات التي عانى منها وكادت تحرمه من الكرة.
تصريحات طارق حامد
وقال طارق حامد في تصريحات تليفزيونية: بدأت الكرة وأنا عندي 5 سنين بلعب في الشارع الناس دايمًا كانت بتشاور عليا، وأنا 10 سنين روحت اختبارات نادي المنصورة خضت 3 اختبارات نجحت في 2 وفشلت في الأخير.
وواصل: قدمت في السنة الثانية، واستمريت في المنصورة حتى 14 عاما، ولعبت في الناشئين بدون عقود، وظروفي المادية كانت صعبة، خاصة أن والدي اتوفى وانا عندي 3 شهور، ولم أره.
وأضاف: كنت بلعب كورة لكن مفيش دخل، وحسيت إني عبئ على أمي وكنت بحب الكورة وعايز أوصل، لكن في نفس الوقت كنت عايز أساعد والدتي وقررت أخد خطوة تانية علشان أريحها، وقررت مش هلعب كورة تاني وقولت هسافر لبنان بالتحديد وعملت جواز السفر بالفعل، لأني كنت مضطر لكن الظروف مساعدتنيش.
وتابع: علشان أركب مواصلات لنادي المنصورة كنت باخد جنيه أو 75 قرش، وكنت بمشي حوالي 5 كيلو علشان مش معايا فلوس، ووقتها قررت السفر لمساعدة أمي لكن السفر لم يكتمل.
وأكمل: في هذه الفترة أحد الأشخاص قرر مساعدتي ونصحني بالانتقال إلى الإسماعيلي، وعانيت في البداية بسبب المسافة وعدم وجود سكن لي في الإسماعيلية، ولم أكن أمتلك حذاء خاص بالكرة، واستلفت من صاحبي، فقررت ترك الكرة من جديد.
واختتم طارق حامد تصريحاته: اشتغلت لمدة سنة في مطعم بجانب الدارسة، وكان راتبي 240 جنيه في ذلك الوقت، بعد كدة قررت ترك العمل والعودة إلى الكرة من جديد.
