أحمد جوهر عن واقعة محمد فؤاد وطبيب عين شمس: اتعمل علينا فيلم.. واعذروا الفنان دا صاحب مرض
كشف الفنان أحمد جوهر، تفاصيل واقعة مشاجرة الفنان محمد فؤاد وطبيب مستشفى عين شمس التخصصي، موضحًا أن الطبيب من استفز فؤاد، مطالبًا من الجمهور مراعاة الحالة الصحية لـ محمد فؤاد وعدم مهاجمته.
وقال أحمد جوهر، في لايف مع القاهرة 24: محمد فؤاد قال للطبيب واضح إن حضرتك لسه صاحي من النوم أو مش نايم كويس، راح الدكتور بص له من فوق لـ تحت، واستفزنا وقال فين الأمن اطردوا الناس دي كلها برا، ومحمد قاله أخويا تعبان وبيموت مني وأنا أصلًا تعبان.
وواصل أحمد جوهر: الناس شافت محمد تعبان إزاي وفمه عامل إزاي، وأنا عايز أقول إن أي إنسان في الدنيا لو تعرض لتجاهل ومعاملة وحشة وهو في موقف زي اللي كان محمد فؤاد فيه أعذروه هو راجل صاحب مرض وتعب.
وأضاف أحمد جوهر: إحنا لاقينا الدكاترة بيصوروا واتعمل علينا فيلم، ومحمد فؤاد معملش محضر وكلنا كلنا معاه، وإحنا رحنا مستشفى مبرة في مصر القديمة وأخوه عمل العملية بتاعته ومفكرناش في المحضر وفكرنا في أخو محمد فؤاد، وأنا كنت عند محمد فؤاد أول امبارح وحد قالي إنه هيعمل محضر وهو لازم يعمل محضر.
حالة شقيق الفنان محمد فؤاد
وواصل: إن شاء الله النقيب مصطفى كامل، تدخله يكون خير، وعبد العزيز أخو محمد فؤاد كويس ومحمد كان عنده، وأكيد محمد فؤاد اتظلم في الموضوع ده، ده واحد أخوه تعبان الساعة 4 الفجر، وبقول للي هاجمه إن جاءكم فاسق بنبأ فتبينوا، والموقف ده أي بني آدم في الدنيا بيتعرض له، وربنا يشفي محمد فؤاد ويشفي أخوه.
