حمزة نمرة يكشف سبب حبه للنجارة وإمكانية دخوله التمثيل والتعاون مع مطربي المهرجانات
تحدث المطرب حمزة نمرة عن رأيه في أغاني المهرجانات، بجانب سبب حبه للنجارة وإمكانية دخوله مجال التمثيل والمشاركة في عمل فني، وذلك خلال لقائه مع الإعلامي عمرو الليثي عبر قناة الحياة ضمن مهرجان العلمين الجديدة.
رأي حمزة نمرة في أغاني المهرجانات
وعن رأيه في أغاني المهرجانات قال حمزة نمرة: أنا لا أؤمن بتنصيف الفن لهابط وغير هابط، وفيه أذواق، وفي الآخر بقول الأغنية عجباني أو وحشة بالنسبالي، مش معنى كده أنها لا تستحق طالما الكلام غير مسف، غير كده أي أغنية بأي طريقة بأي استايل من أول المهرجانات لحد الأوركسترا من حقها تطلع للجمهور.
هل من الممكن أن يتعاون حمزة نمرة مع مطرب مهرجانات؟
وعن إمكانية تعاونه مع مطربي المهرجانات قال: لا أمانع التعاون مع مطرب مهرجانات لو فيه سياق ينفعنا إحنا الاتنين، وبعضهم بيعجبني ومنهم حودة بندق ومسلم وفنانين كتير، بجانب حبي للأغاني الشعبي وبحب طارق الشيخ، ومعنديش مشكلة في اللون طالما الكلام مقبول وله معنى حلو ومفيش مشكلة في القالب الفني.
وواصل حمزة نمرة: حريص جدًا في مشواري الفني أني أقدم أغاني تسيب علامة وأثر ويحترمها الجمهور وشاركت في بدايتي بفرقة الحب والسلام، وكان ليها تأثير كبير جدا في شخصيتي واختياراتي الفنية، واتعلمت منهم الجرأة وأن أقدم أفكار جديدة في الأغاني.
حمزة نمرة يكشف سبب حبه للنجارة
وكشف حمزة نمرة عن سبب حبه للنجارة قائلًا: بحب فكرة الشغل اليدوي وإنك تعمل حاجة من خام وتحولها لحاجة تانية وبحس فيها الفكرة الفنية، لأنك بتحول أغنية عبارة عن أصوات وخامات لأغنية بشكل مختلف، والصنعة دي حلوة وبلاقي الكلام ده بيحصل في النجارة وتصليح العربيات، ونفسي لو فيه تعليم أسبوع أو اتنين أو شهر أروح الورشة دي اتعلم فيها ويكون عندي ورشة بتاعتي وأعمل منها كراسي.
هل من الممكن أن يشارك حمزة نمرة في التمثيل؟
كما كشف حمزة نمرة إمكانية دخوله مجال التمثيل ومشاركته في أعمال فنية، قائلا: أنا حاطط قدامي أحمد زكي ونور الشريف ومحمود عبد العزيز وغيرهم ودول ناس محترفين تمثيل وبيبينوا لك أن التمثيل صنعة، وأنا أتكسف إني أفكر أمثل في حضرة ناس عظماء زيهم، ولو عاوز أمثل المفروض أدرس وتبقى صنعتي وأركز فيها، لكن أنا عارف أنا هدفي فين من زمان وبحب الفن والمزيكا وأحب أعبر عن نفسي بالمزيكا ومش مفقتد تعبير إضافي من خلال التمثيل.
