بطلوا تعملوا فتنة.. محمد رحيم يوجه رسالة لمنتقديه بسبب شيرين عبدالوهاب
أعرب الملحن محمد رحيم، عن استيائه الشديد بسبب تعرضه للهجوم، بعدما نشر مقطع فيديو لطفل روسي يغني أغنية الوتر الحساس لشيرين عبدالوهاب، والتي تعد من ألحانه، إذ اتهمه الجمهور بتعمد عدم كتابة اسم شيرين عبدالوهاب في منشوره.
تعود البداية عندما نشر محمد رحيم، مقطع فيديو لـ طفل روسي يغني أغنية الوتر الحساس لشيرين عبدالوهاب، عبر حسابه الشخصي بموقع X، وكتب: توصيل الموسيقى بتاعتنا لكل دول العالم حلم كان في دماغي من بداياتي واشتغلت عليه من قلبي، وكل ما بشوفه يتحقق بحمد ربنا من كل قلبي وبفرح أوي علشان إحنا نقدر نعمل كل حاجة إن شاء الله، طفل روسي يغني الوتر الحساس بالعربي.
وانتقد الجمهور محمد رحيم، بسبب عدم كتابته اسم شيرين عبد الوهاب، عند ذكر اسم أغنية الوتر الحساس، فعلق: إيه يا جماعة كل الشتايم وقله الأدب دي، علشان بحتفل بنجاح لحن من ألحاني زي ألف لحن نجح لي قبل كده، طب أنت كجمهور فنانة بتحبها ومتحيز ليها وفاكر أن هي بس اللي بترزق الناس، أنا إيه ذنبي أنك جاهل ومش عارف أني أخدت ميوزيك أوورد سنة 2000 قبل أنت ما تتولد في أغنية حبيبي ولا على باله، مثلًا كان عندي 20 سنة.
وأردف محمد رحيم، أنه لم يقصد عدم كتابة اسم شيرين عبد الوهاب، ولم يتعمد تجاهلها ونسب أغنية الوتر الحساس لنفسه كملحنها، قائلًا: أنا مكنتش أحب أنزل لمستوى أني أتكلم مع شوية عيال صغيرة وأقول الكلام ده بدل ما نبارك لبعض كلنا زي كل جمهور محترم لكل فنان أنا اشتغلت معاه، ألاقي شوية عيال بتشتمني علشان بتكلم عن نجاح لحن من ألحاني أنتوا إزاي كده؟ طبعًا النجاح للكل والعمل عمل جماعي وأنا عمري مابنسى اكتب اسم مهندس الصوت نفسه علشان أنسى النجم.
وأضاف محمد رحيم: وبعدين أنا بحب شيرين من قلبي ومن أكتر من عشرين سنة وإحنا بنشتغل وبننجح صبري قليل، مشاعر، الوتر الحساس، كلها أغاني ومحطات مهمة لينا إحنا الاتنين بطلوا تثيروا فتنة بينها وبين زملاؤها في الوسط وصناع أغانيها وأبعدوها عن دائرة التوتر والخلافات.
