خالد الحجر: أعيش بشقة ليلى مراد في الخمسينيات.. وطاقتها فنية ومفيهاش أشباح| فيديو
روى المخرج خالد الحجر، القصة وراء سكنه بشقة الفنانة ليلى مراد، التي يعيش بها منذ 11 عاما وحتى الآن، مشيرا إلى أن طاقة المنزل فنية بحت.
وقال خالد الحجر خلال لقائه مع القاهرة 24: أنا عايش في شقة ليلى مراد اللي كانت بتاعتها وقت زواجها من أنور وجدي في الخمسينيات لمدة 6 سنين، وبعدين اتطلقوا، وهو راح سكن في عمارته والشقة بقت ملك الشركة، وهي سكنت في شقق مختلفة.
وأضاف خالد الحجر: وأنا من خلال معرفتي بـ زكي فطين عبد الوهاب رحمة الله عليه، نجلها، وإننا كنا صحاب جدا، لما توفيت ليلى مراد، زكي اكتأب ولم العفش كان عايز يحطوا في مخزن، ولكن أقنعته يخليه عندي، وطلب مني إني مبيعهوش، والعفش مازال عندي.
وأردف الحجر: وبالصدفة من 11 سنة اشتريت الشقة دي في عمارة الإيموبيليا، وبكدة العفش بتاعها رجع لنفس الشقة تاني، وعكس الكلام اللي بيتقال، الشقة طاقتها مختلفة وفنية ومش مخيفة.
خالد الحجر يتحدث عن عمارة الإيموبيليا
وفي السياق ذاته، سبق وكشف خالد الحجر حقيقة سكون الأرواح لعمارة الإيموبيليا، حيث قال: بحس بطاقة فنية في العمارة، مش طاقة وحشة أو مرعبة، وأنا عيشت فيها 11 سنة، العمارة سكن فيها عظماء الفن، بدايةً من أسمهان، كاميليا، نجيب الريحاني، ليلى مراد.
