صاحب فيديو إهداء الوردة يستغيث: الشركة استغلتني إعلاميًا ورفدوني بعد التريند.. وبيتي اتخرب
استغاث يحيى أحمد عبد الحميد يوسف، صاحب الـ32 عامًا من العمر، ابن مركز كوم أمبو في أسوان، والذي اشتهر خلال الأيام القليلة الماضية، عبر منصات التواصل الاجتماعي، بصاحب فيديو الوردة، وذلك بعد أن فقد وظيفته كعامل أمن بأحد الشركات في القاهرة.
صاحب تريند إهداء الوردة يستغيث
وقال الشاب يحيى أحمد عبد الحميد يوسف، صاحب تريند فيديو الوردة، في تصريحات خاصة لـ القاهرة 24: وردة خربت بيتي، من أول ما ظهرت في الفيديو اللي البت أعطتني فيه الوردة وتصدرت تريند مواقع التواصل الاجتماعي، وتعرضت للاستغلال الإعلامي من قبل الشركة التي كنت أعمل بها.
وتابع الشاب يحيى أحمد عبد الحميد يوسف: الشركة طلبت مني اطلع مع القنوات والبرامج التليفزيونية، وأذكر اسمها كنوع من الدعايا والترويج لها، وخلال الانتهاء من التصوير بأحد القنوات التليفزيونية، وكنت راكب عربية القناة اللي هتوصلني نزلوني في الطريق ومكنتش معايا وقتها فلوس تذكرة القطار.
وأضاف الشاب يحيى أحمد عبد الحميد يوسف، صاحب تريند فيديو الوردة: لما رجعت على أسوان الشركة بعتتلي رسالة، إنهم استغنوا عني في الشغل، وهيبعتولي مستحقاتي بعد يوم 20 سبتمبر.
واستكمل الشاب يحيى أحمد عبد الحميد يوسف: لو كنت اعرف إن كل دا هيحصل مكنتش خدت الوردة، ولو كنت أعرف إني بتصور مكنتش وافقت، الوردة والتريند خربوا بيتي وسيبوني شغلي وخلوني مش عارف أرجع من القاهرة لأسوان، لدرجة إني كلمت مراتي وقولت لها ابعتي ليّ فلوس تذكرة القطار.
واختتم الشاب يحيى أحمد عبد الحميد يوسف: فين صاحب الصفحة اللي صورني يشوف بيتي اتخرب ازاي، بعد ما صاحب الشركة استغلني إعلاميًا، وكان بيروج من خلالي لاسم الشركة، وأنا على باب الله مكنتش فاهم إيه اللي بيحصل، لحد ما مشوني من الشغل، وأنا فاتح بيت وعندي طفلين ومحتاج لأي وظيفة.
