ميس حمدان: غيابي عن الفن بسبب تقصيري.. وفيه مخرجين مش عارفاني
تحدثت الفنانة ميس حمدان، عن سبب غيابها عن الوسط الفني لفترة طويلة قبل عودتها خلال الأشهر القليلة الماضية، موضحة أن الأمر يعود إلى التقصير من جانبها.
وقالت ميس حمدان، خلال حوارها في أحد البرامج: كان عندي ركود في شغلي ومكنش فيه أعمال متاحة، والحالة مريت بيها من 7 سنين، وأنا طوال عمري فنانة من وأنا صغيرة ومكنش عندي مهنة تانية غير الفن، وأنا متشبعة بالفن من جوايا، وفي لحظة ما قررت أدور على شغل تاني، وعملت بيزنس خاص بيا، وبالفعل دخلت في دوامة مهنة جديدة، ولكن بعد فترة الشغف تراجع، وفي النهاية أي مهنة بها صعود وهبوط وده طبيعي.
وواصلت: أعترف أني خلال الـ7 سنين اللي فاتوا مكنتش منتعشة في مهنتي الأساسية اللي هي الفن، وطبعًا الموضوع فيه تقصير مني ومبحبش ألوم العوامل الخارجية على كل اللي بيحصلي، ولكن ألوم نفسي الأول.
ميس حمدان: أخطأت في حق نفسي بشأن مهنتي
واستطردت: أكيد أخطأت في حق نفسي بشأن مهنتي، منها أني كنت برفض أعمال كتير بتتعرض عليا، وهي أعمال مكنتش مقتنعة بيها بنسبة 100% وده غلط لأنه بالتأكيد لا يمكن أقتنع بالنسبة دي، ولكنه كان شغل مهم أعمله ويفضل اسمي متداول وأعمل علاقات وده أمر مهم.
وأردفت ميس حمدان: قابلت مخرجين كتير قالوا لي مش فاكرينك وقت ترشيحات في عدد من الأعمال، وده مش خطأهم ولكنه خطأ مني، لأن البعيد عن العين بعيد عن القلب.
