والدة شاب تعرض لإهمال طبي في مستشفى الكبد بالدقهلية: الدكتور قالي هيموت ومحتاج عملية بـ200 ألف
استغاثت والدة مريض يدعى محمد فرحات في مركز طلخا محافظة الدقهلية، موضحة أن ابنها تعرض لإهمال طبي على يد أحد الأطباء بمستشفى الكبد، مما سبب له مشاكل كبيرة في الجهاز الهضمي، وبسبب ذلك يحتاج إلى إجراء عملية تحويل مسار بـ200 ألف.
والدة شاب تعرض لإهمال طبي بمستشفى الكبد بالدقهلية
وقالت والدة محمد فرحات في تصريحات خاصة لـ القاهرة 24: ابني عنده 21 سنة، كان عامل عملية تكميم من 3 سنوات، وفي 2023 بدأ يتعب تانى، وبعدها رحت لمستشفى الكبد في شربين بالدقهلية، وقالولي لازم يعمل عملية في المرارة، وتاني يوم من العملية جاتله سخونية شديدة، ومش عارفين من ايه، والدكتور كان يقولي حالة نفسية، وبعديها خرج من المستشفى، ومجرد ما خرج تعب جدًا، ومش بيقدر يأكل أي حاجة.
وتابعت: وبعدها رجعت للدكتور اللي أجرى له العملية، وقلتله ابني بيعاني من سخونية جامدة، فرد عليا وقالي هو عنده حالة نفسية، وبسبب كده رحت لدكتور خارجي في المنصورة، وقالي ابني بيعاني من تجمعات دموية، وهي سبب السخونية، وبعدها عمل عملية لإزالة تلك التجمعات الدموية، وبعد 4 شهور تعرض لألم شديد في معدته، فاضطريت اعمله منظار في المعدة، ونفس الدكتور من مستشفى الكبد قالي أنه كويس ما فيش فيه حاجة، ابنك بيتدلع، ودي حالة نفسية.
وأكملت: وبعدها رحت بأبني لدكتور تاني، فقالي هو عنده فتق في الحجاب الحاجز وارتجاع في المريء، ومحتاج عملية تحويل مسار، وبعدها عرضت الأشعة على الدكتور عشان يعمله العملية، فقالي ده فتق بسيط، وبعدها رجع في كلامه، بعد ما عرضت الأشعة على مستشفى الجهاز الهضمي، فقالي العملية خطر وهتاخد 8 ساعات، وبالفعل أجرى عملية تحويل مسار في شهر 7 2023، ومن ساعتها وهو تعبان جدا، وعايش على العصير والمحاليل، وكل ما أروح للدكتور يقولي عنده تعب بسيط بس، ولما روحتله تاني قالي هو محتاج عملية خطيرة، وممكن تؤدي إلى الوفاة.
وأشارت والدة محمد فرحات إلى عرض ابنها على طبيب استشاري قائلة: وبعدها عرضت ابني على طبيب مختص، وتبين أن آخر عملية، وهى تحويل المسار التي أجراها الطبيب الأول تمت بشكل خاطئ، وأجمع الأطباء على أنه يحتاج لعملية خطيرة ورفض العديد من الأطباء إجرائها له، وبعدها توجهت للمحافظ ووكيل وزارة الصحة لتقديم الشكاوى، فوافق أحد الأطباء على إجراء العملية، لكن تكلفة العملية بلغت 200 ألف جنيه.
وناشدت والدة محمد فرحات المسؤولين بإيجاد حل لمشكلة ابنها قائلة: بسبب إن ابني محتاج إجراء العملية، تبرع لي بعض القلوب الرحيمة، ووصل المبلغ لـ 40 ألف، وأنا بس محتاجة حد يساعدني عشان ابني يعمل العملية ويعيش حياة طبيعية.
