إيناس الدغيدي تثير الجدل: عشت المساكنة قبل زواجي.. ومش حاطة الحرام تارجت في حياتي| فيديو
حلت المخرجة إيناس الدغيدي ضيفة على برنامج القرار المذاع على قناة الغد، وتحدثت بجرأة عن العديد من الأمور الخاصة، ومنها أنها عاشت المساكنة مع زوجها قبل الزواج.
حياتي كلها فيها جرأة
وقالت إيناس الدغيدي عن تلقيبها بالجريئة: مختارتش أكون جريئة، أنا فعلا جريئة وحياتي كلها فيها جرأة وأنا مكنتش متخيلة إني جريئة، وبتصرف عادي ولكني طلعت جريئة، ولما دخلت الفن ومعهد السينما كان بالنسبة لي لحظة جرأة لأننا من عيلة ملهاش علاقة بالفن، وعيلة ملتزمة دينيًا ووالدي كان مدرس لغة عربية ودين.
مفكرتش في الحرام كتير
وأكدت إيناس الدغيدي أنها لم تفكر في الحرام طيلة حياتها موضحة: مفكرتش في الحرام كتير، ومش حطاه التارجت بتاع حياتي، لأني لو فكرت وقلت حرام حرام، مكنتش عملت أي حاجة في حياتي.
وأضافت إيناس الدغيدي: الناس شايفني عملت الحرام أكبر بكتير من اللي أنا عملته لأن أفكاري وجرأتي أدت انطباع غير شخصيتي الطبيعية خالص، لكن أنا مش بشرب خمرة ولا سجاير وعلاقاتي مظبوطة ومناسبني سنًا وعقلًا ومش بعمل علاقة من تحت الترابيزة، وممكن أدخل علاقة الناس تشوفها حرام لكن أنا بشوفها عادية طالما فيها صدق وحب واهتمام، وما بحاسبش روحي بالحلال والحرام، وأفكاري الجريئة ظلمتني زمان وقدرتني النهارده لأن اللي بيتعمل أكتر بكتير من اللي قلته.
عشت المساكنة مع جوزي
وفي تصريح جريء كشفت إيناس الدغيدي أنها لم تتزوج عرفيًا على الإطلاق ولكنها عاشت المساكنة قبل زواجها من زوجها، قائلة: عمري ما اتجوزت عرفي، لكني عشت المساكنة مع جوزي قبل ما أتجوزه أكيد، لأني قعدت تسع سنين بحبه، ومش فاكرة المساكنة كانت كام سنة بالظبط.
عندي 70 سنة ومش خايفة من الموت
وأكدت إيناس الدغيدي أنها متصالحة مع عمرها، مشيرة إلى أنها تبلغ من العمر 70 عامًا، مردفة: سعيدة جدًا، وسن السبعين سن جميل، ومش حاسة باختلاف ولا حاسة إني كبرت ولا تعبت، ولسه مش بشوف خط النهاية اللي هو الموت، ودايمًا عندي حتة خيالية لكل شيء وشايفة الموت حياة فيها جمال ومش خايفة منه، لأن هو أكثر هدوء وسلامًا وروحانية وحاجة مش عارفاها وأنا بحب أكتشف كل حاجة في الحياة، ويمكن أنا الوحيدة اللي هتموت وترجع تقول حصل إيه.
مقدرش أعيش من غير حب
وبسؤالها عن إذا كانت تعيش قصة حب الفترة الحالية قالت: مقدرش أعيش من غير حب، وممكن أحب شخص شايفاه أنه يصلح أني أحبه وهو مش مديني كل المعطيات بتاعة الحب، ويا رب ميدينيش علشان أفضل أحبه، يعني موجود لكن مفيش تعاطي بينا وبين بعض.
