عمر خيرت: أعتز بمصريتي وتأليف الموسيقى صعب مثل تربية الأولاد.. والألحان الجديدة لا تستهويني
حل الموسيقار عمر خيرت، ضيفًا في حلقة خاصة مع الإعلامية إسعاد يونس، في برنامجها صاحبة السعادة المذاع عبر شاشة قناة DMC، وتحدث خلال اللقاء عن الجمهور المصري ورأيه في الألحان الموسيقية المعاصرة، ونصيحته للمبتدئين.
أبرز تصريحات عمر خيرت في صاحبة السعادة
- أهم حاجة العلم ودراسة الموسيقى هي أهم شيء يوصل أي موهوب للي هو عاوزه.
- مارست الموسيقى العالمية والمصرية، وجميع أنواع الموسيقى، وتذوقي مختلف لأنواع الموسيقى الأخرى، وكلامي ليس تقليلا منها.
- تأليف الموسيقى بيكون لها تعب والفكر بتاعها زي تربية الأولاد متعبين حتى لما بيكبروا بنكون واخدين بالنا منهم.
- اللحن بيكون ابني، وبحاول أربيه كويس عشان يأثر في الناس زي ما أثر فيا، ولازم يكون صادق.
- بحب الموسيقى طول عمري من لما كنت طفل، والأسرة عندي كمان بتحب المزيكا.
- عمري ما حسبت ايه اللي هيحصل أنا حبيت حاجة واشتغلت فيها وذاكرت فنجحت.
- أعتز إني مصري وكل فريقي في الأوركسترا مصريين، مصر فيها أكاديمية للفنون وفنانين عالميين أسماؤهم في الدنيا كلها بتتقال فتحيا مصر.
- الشعب المصري ذواق جدًا اللي اتربى على سمع أم كلثوم ومحمد عبد الوهاب وعبد الحليم حافظ، الجمهور عنده حس موسيقي وفني وأذن بتسمع كويس فاحنا محظوظين.
- المبدع اللي قدر ببراعته وموهبته ياخد من دوشة الصوت نغمة ويفتل النغمة لحن ويغزل اللحن مقطوعة وينسج المقطوعة في سيمفونية ويرمي توب الإبداع على المستمعين فيتسحروا بجماله.
- بالنسبة للحداثة وأي حاجة بتحصل بعد كده بالنسبة لأي موسيقى أو أغاني جديدة، لا يصح غير الصحيح، يعني حاجات تطلع وحاجات تمشي بس منقدرش نمنع أي حد إنه يعبر عن نفسه اللي عايز يغني أو يعمل حاجة يعمل اللي هو عايزه.
- الألحان الجديدة مش من النوع اللي بيستهويني ومفيش لحن من الألحان الجديدة بيجذبني ومش معنى كده إني بذم فيه.
