متفرجش من الأساس.. روجينا ترد على نقد طارق الشناوي لها بمسلسل سر إلهي: حر في رأيه
علقت الفنانة روجينا على أزمتها مع الناقد الفني طارق الشناوي بسبب مسلسل سر إلهي الذي عرض ضمن السباق الرمضاني لعام 2025، ورفع زوجها الدكتور أشرف زكي، دعوى قضائية ضده بسبب مقال كتبه عنها.
روجينا ترد على نقد طارق الشناوي لها عن دورها في مسلسل سر إلهي
وقالت روجينا خلال استضافتها ببرنامج الراديو بيضحك مع الإعلامية فاطمة مصطفى: مضيقتش خالص واحترمت نقده، ومطلعتش رديت عليه وبحترمه جدًا، ولكن هو قال هي قدمت 3 مسلسلات ليها ودا رابع تجربة ليا فمعنى كده أن هو متفرجش من الأساس، واستنيت يقول عملت الشخصية بطريقة مش حلوة، كنت كده هحترمك بس كده هو قال رأيه، ورأيه هو حر فيه ولكن مشكلته مع أشرف زكي وببينهما القضاء، وأنا بعيدة عن المشاكل لأني بحب الهدوء النفسي.
وعن سبب تعرضها لحروق في وجهها خلال الفترة الماضية قالت روجينا: قضيت أسوأ عيد في حياتي وروحت أصيف وقولت عاوزة أخد لون ولكن محستش وأنا قاعدة في الشمس، وفجأة روحت لقيت وشي ورم وشوفت أيام صعبة في الساحل، ومكنتش لاقية مكان فيه حقن أخدها، معلقة: شغلتنا الوش فيها رأس مالنا، والناس قالوا حقنت وشها وكل واحد بقى بيطلع يقول رأيه، والناس بقت تفتي كتير أوي.
وفي سياق آخر، قالت: مايا بنتي بتقولي مش هشتغل معاكي ودا مزعلني، منها وهي مساعد مخرج ومن أهم الأسامي، ولكن خايفة تكبر ومترداش تشغلني معاها، وكنت بتخانق مع مريم بنتي في سر إلهي، ورؤوف عبد العزيز كان ديمًا يقولي ابعدي عنها، ومريم مش أول تجربة ليها وهي ممثلة شاطرة.
