محمد سامي: معنديش خلافات مع محمد رمضان.. وجعفر العمدة من أهم المسلسلات ومينفعش أغامر بنجاحه
رد المخرج محمد سامي، على شائعات خلافاته مع الفنان محمد رمضان، وجدل إلغاء الجزء الثاني من مسلسل جعفر العمدة، بعدما حقق الجزء الأول نجاحًا كبيرًا في رمضان 2023.
وقال محمد سامي، في لقائه مع القاهرة 24: معنديش خلافات أنا ومحمد رمضان كل اللي بيتقال ده كذب طبعًا، أنا ومحمد رمضان إزاي هيبقى عندنا خلاف؟ ده إحنا نجاحنا مع بعض الحمد لله رب العالمين من أكتر نجاحاته ونجاحاتي، بالعكس علاقتي أنا ومحمد رمضان كويسة جدًا.
أما عن جدل إلغاء الجزء الثاني من مسلسل جعفر العمدة، فعلق محمد سامي: جعفر العمدة 2 علشان يتعمل مشروع لازم يدرس كويس جدًا، مينفعش نغامر بنجاح جعفر العمدة 1 وأدخل أعمل جعفر العمدة 2 بلا دراسة.
وأضاف محمد سامي: جعفر العمدة من أهم المسلسلات اللي اتعملت وده مش برأيي أنا ولكن كلكم عارفين أنه من أهم المسلسلات في الفترة الأخيرة، ونجح نجاح كبير في الوطن العربي كله، المسلسل ده لازم يتعمل بحساسية رهيبة.
مسلسل جعفر العمدة
ومن ناحية أخرى، حقق مسلسل جعفر العمدة، بطولة الفنان محمد رمضان نجاحًا كبيرًا في الموسم الرمضاني 2023، في مصر والوطن العربي، وشارك رمضان في بطولة العمل كل من: الفنانة مي كساب، زينة، إيمان العاصي، هالة صدقي، أحمد داش، أحمد فهيم، عصام السقا، منذر رياحنة، وغيرهم من النجوم، والعمل من تأليف وإخراج محمد سامي.
