أقوال عريس الدقهلية المزيف: صورت المقطع علشان المتابعين وأرباح القناة تزيد معرفش أنه هيوصل لكدة|بث مباشر

يواصل موقع القاهرة 24، استعراض آخر المستجدات في قضية عريس الدقهلية صاحب واقعة مشهد اختطافه ليلة زفافه من أمام قاعة الحفلات، من أجل تحقيق أعلى نسب مشاهدة وتحقيق التريند.

آخر المستجدات بواقعة اختطاف عريس الدقهلية 

حصل القاهرة 24، على نص تحقيقات عريس الدقهلية المتهم بالتمثيل أمام أسرته بمشهد أختطافه في ليلة زفافه، حيث قال: اللي حصل إن أنا كان فرحي يوم الخميس اللي فات وكنت عايز أعمل حاجة وأصورها تبقى تريند وتزود نسب المشاهدات على الصفحة بتاعتي علشان الأرباح تزيد، وبعد كده في آخر الفرح اتفقت أنا وأحمد،ا ومحمد،س إنهما الاثنين بعد ما أخرج من القاعة يجوا بعربية ويخطفوني جواها، ونعمل مقلب في الناس وبعد كدة ننزله على اليوتيوب.

وأستكمل عريس الدقهلية: وفعلا هما عملوا اللي أنا قلتلهم عليه وجم بعربية وخطفوني وأنا روحت ونمت، ولما صحيت لقيت المقطع على اليوتيوب، ولقيت أهلي منزلين مقطع إنهم بيدوروا عليا روحت ناشر مقطع الفيديو الثاني اللي كنت مصوره وبشرح فيه إن أنا هعمل تريند وهعمل مقلب في الفرح بتاعي.

وأضاف: أنا معايا السلاح وبشيله معايا علشان بسافر ويبقى معايا حمايا ومعرفش إن في ترخيص للمسدس الصوت، وأنا عندي صفحة على اليوتيوب اسمها جمهورية أحمد وأمل وبعمل فيها مقالب، وعملتها من حوالي 3 سنوات، عشان أكسب فلوس منها عن طريق الإعلانات والمشاهدات.

واختتم المتهم عريس الدقهلية: صورت المقطع دا علشان بنهزر والمتابعين تزيد وأرباح القناة تزيد، وعملت الموضوع كله على سبيل الهزار ومعرفش إنه هيوصل لكل ده.