ريهام عبد الغفور عن والدها الراحل: كلمته قبل وفاته بـ 3 دقائق.. وكان بيضحك في غُسله
تحدثت الفنانة ريهام عبد الغفور، عن والدها الفنان الراحل أشرف عبد الغفور، معربة عن اشتياقها الكبير له، كاشفة تفاصيل اللحظات الأخيرة في حياته وقبل نقله إلى مثواه الأخير.
ريهام عبد الغفور عن والدها الراحل: كان بيضحك في غُسله
وقالت ريهام عبد الغفور، خلال تصريحات تليفزيونية: بتمنى أكون شبه والدي في أخلاقه ومهنيته هو كان شخص عظيم جدًا وكريم ونبيل، والدي كان بسيط جدًا وبيتعامل مع الناس كلها بحب غير طبيعي، والدي توفى بعد ما عدى 80 سنة ولكن كان شاب طول الوقت، ولما توفى مكنتش مصدقة سنه لأن هو اللي كان بيعلمنا ومعتمدين عليه في كل حاجة.
وأضافت ريهام عبد الغفور: والدي أكتر شخص في الدنيا عمره ما خذلني ولا خذل أي حد من أولاده، وعمر ما حد طلب منه حاجة واتأخر عليه، أبويا كان أقرب صاحب ليا وافتقده كثيرا لأن هو كان الأب المثالي ومتفهم أوي وعمري ما احتاجت أبرر أي موقف حتى لو غلط، كان متفهمني وحنين جدًا، وكان عايش للناس مش لنفسه.
واختتمت ريهام عبد الغفور: فقدان أب طيب وحنين، شيء قاسي، خاصة أن طريقة الوفاة كانت قاسية، كان جاي يتغدى معايا وكلمته قبل وفاته بـ 3 دقائق، وبعدها جاتلي مكالمة أنه عمل حادثة، ملحقتش أودعه، أبويا كان بيضحك في غُسله واتخضيت وافتكرته صاحي، ربنا يرحمه وهو أكيد مبسوط في الجنة.
