ريهام عبد الغفور: بحاول أعلم ولادي يبقوا زي أبويا.. وكل طموحي السلام النفسي
كشفت الفنانة ريهام عبد الغفور، عن كيفية تربية أبنائها على احترام المرأة، موضحة أنها تُحاول جعل أبنائها مثل والدها الفنان الراحل أشرف عبد الغفور.
وقالت ريهام عبد الغفور، في لقائها بـ برنامج كلام نواعم، المذاع عبر شاشة قناة MBC: بتكلم مع ولادي من وهما صغيرين ازاي يتعاملوا ويحترموا المرأة، وأن ممنوع الهزار بالإيد مع البنت والراجل هو المسئول عنها ويديها كل حاجة بحب واحتواء، بحاول أعلمهم يطلعوا زي بابا.
وتابعت ريهام عبد الغفور: أنا لما بشوف واحد بيمد إيده على واحدة أو بيعلي صوته عليها أو بيتجاهلها بيفقد احترامي ليه، والأمومة وأولادي أكتر حاجة تهمني، وبعده شغلي وأنا بحب شغلي جدًا وبعمل كل حاجة علشانه، ولكن لو خيروني بين ولادي وأي حاجة هختار ولادي.
ريهام عبد الغفور: منصحش بالزواج المبكر
كما كشفت ريهام عبد الغفور، تجربتها بالزواج المبكر، قائلة: منصحش بالزواج المبكر، ولكن كل واحد عنده التجربة بتاعته وأنا شخص بقلق وبتوتر فالجواز كان مسئولية كبيرة على سني، وفكرة أني خلفت ابني يوسف اللي هو دلوقتي أكتر حد بيفهمني وكلامه بيمشي عليا أكتر من أي حد، وبسبب أني خلفته بدري من خوفي عليه مبقتش مستمتعة بالسن بتاعه وحياته زي ما أنا عايشة ده دلوقتي مع ابني الصغير.
وأضافت: السلام النفسي أهم حاجة، والواحد لما بيكبر بيحس أن كل طموحه هو السلام النفسي، وده مش سهل لأنه بيبقى محتاج بيئة تساعد على ده، والفترة دي بدأت اشتغل على نفسي أني ماخدش كل حاجة على أعصابي، والفن مهنة كلها ضغوط.
