زوجة المطرب أحمد فهمي: معجباته آخر همي.. وأنا بغير عليه لكن مش هتجنن
كشفت الفنانة أميرة فراج، زوجة المطرب أحمد فهمي، عن حقيقة منعها من الغناء، بجانب الحديث عن طريقة تعاملها مع المعجبات.
وقالت أميرة فراج خلال لقائها مع القاهرة 24: المعجبين آخر همي وأنا بغير عليه لكن مش هتجنن وبفرح لنجاحه طبيعي.
وبشأن التصريحات الأخيرة حول منع زوجها أحمد فهمي لها من الغناء، ردت أميرة فراج قائلة: الموضوع ده كان قديم جدا وكنا إحنا لسه صغيرين أنا وفهمي نعرف بعض بقالنا 20 سنة وأنا اتجوزته وكان عندي مسؤوليات، ومفيش أي منافسة بينا.
وفي سياق آخر، تحدث أحمد فهمي في أحد المنصات مؤخرًا عن بدايات زواجه من أميرة فراج، وقال: الجواز في سن صغير حلو، أفتكر بيخليك متعملش حاجة غلط.
وتابع أحمد فهمي: الزمن اتغير، أنا كنت ولد وحيد ونفسي أتجوز علشان أخلف ولد يبقى زي أخويا، وابني الكبير دلوقتي في الجامعة.
وأضاف: طبعا ابني عمر براحته، لكن لو قال عايز يتجوز هقول له استنى شوية على الجواز، لأن الشخصية بتتغير ووجهة نظره بتختلف.
وبشأن منعه زوجته من الغناء، أوضح: دي أكذوبة الناس كلها اتكلمت عليها، أنا مقعدتش أميرة في البيت، الفكرة إن إحنا إتجوزنا صغيرين، وبعد ما إتجوزنا بسنة أميرة خلفت وكنا أطفال بجد، وأميرة كانت عايزة تاخد بالها من عمر أول ما أتولد.
