استخدمها في جريمة.. سيدة تستغيث من شركة محمول: باعوا شريحة موبايل ببطاقة ابني المسروقة| فيديو

اتهمت إحدى السيدات شركة اتصالات شهيرة ببيع شريحة هاتف محمول إلى مجهول، وذلك عن طريق البطاقة الشخصية لنجلها المسروقة، حيث استخدمها هذا الشخص المجهول في ارتكاب جريمة ابتزاز إلكتروني، ما أدى إلى القبض على نجلها نظرًا لأن الشريحة مسجلة باسمه.

سيدة تستغيث من شركة اتصالات شهيرة

وقالت السيدة في بث مباشر عبر القاهرة 24، إن تفاصيل الأزمة بدأت عند سرقة البطاقة الشخصية لنجلها، ثم توجه السارق إلى فرع لإحدى شركات الاتصالات الشهيرة واشترى خط هاتف محمول من خلال البطاقة، مضيفة: بطاقة أبني أتسرقت وإحنا عارفين مين اللي سرقها، راح خد البطاقة وطلع بيها شريحة من الشركة، وأنا مش عارفة إزاي قدر يشتري شريحة ببطاقة ابني مع إن الشخص مش هو هو، إزاي الموظف باع للشخص ده شريحة الموبايل وهو مش نفس الشخص اللي في البطاقة.

وأضافت السيدة أن الشخص الذي اشترى الشريحة أرسل رسائل إلى رقم آخر تابع له تحتوي على عبارات جنسية غير لائقة، قائلة: اللي اشترى الخط ببطاقة ابني معاه حد تاني بشريحة موبايل باسم واحدة ست.. فـ بعت ليها عبارات جنسية وتهديدات وابتزاز.. وبعد كده راحوا قدموا شكوى في مباحث الإنترنت.

وأوضحت أنه بعد الفحص من مباحث الإنترنت تبين أن الشريحة مسجلة باسم نجلها، وبالتالي تم إلقاء القبض عليه بتهمة الابتزاز الإلكتروني والتهديد، قائلة: لما ابني اتقبض عليه وتواصلنا مع الشركة عشان يجيبوا العقد بتاع الخط قاله إنه مش موجود على السيستم وحتى العقد الورقي مش موجود، وبعدين لجأنا للمركز القومي لتنظيم الاتصالات وبالفعل جاب العقد واتأكدوا إن الخط كان مسروق من ابني.

وأشارت السيدة إلى أن نيابة التجمع تولت التحقيق في الواقعة، وبدورها أحالت نجلها إلى المحاكمة التي خلصت إلى براءته من التهمة المنسوبة إليه، وذلك بعد التأكد من سرقة بطاقته الشخصية، مختتمة: ابني خد براءة وخرج من الحبس بس بعد ما مستقبله اتدمر من اللي حصله.. واللي عملوا فيه كده ناس نعرفهم واستغلوا إن فيه خلافات بيننا.