حسين الشحات: أحمد فتوح غلط واعترف بغلطه.. ناس كتير بتموت من كتر الضغط النفسي وكلنا شفنا أحمد رفعت
وجه حسين الشحات لاعب فريق الأهلي، رسالة لجماهير الكرة، بشأن أزمة أحمد فتوح لاعب فريق الزمالك على خلفية قضيته الأخيرة.
وقررت المحكمة إخلاء سبيل أحمد فتوح لحين موعد جلسته المقبلة، في قضيتي القتل الخطأ وتعاطي المخدرات بعدما تم القبض عليه في أغسطس الماضي.
وقال حسين الشحات عبر حسابه الشخصي على موقع التواصل الاجتماعي فيسبوك: بسم الله الرحمن الرحيم والصلاة والسلام على رسول الله، {واتَّقُوا يَوْمًا تُرْجَعُونَ فِيهِ إِلَى اللهِ ثُمَّ تُوَفَّى كُلُّ نَفْسٍ مَّا كَسَبَتْ وَهُمْ لاَ يُظْلَمُونَ، أنا عايز أتكلم في موضوع كلنا بقينا بنتكلم فيه بس محدش حاسس بحاجة، الموت بقى قريب مننا كلنا وناس كتير بتموت من كتر الضغط النفسي، وشوفنا اخونا وصاحبنا أحمد رفعت ربنا يرحمه يا رب، وشوفنا الأب الروحي إيهاب جلال ربنا يرحمه يا رب.
وتابع: كنت من فترة قريبة في مشكلتي مع محمد الشيبي وكان عليا ضغط ربنا وحده إلي كان عالم بيا، وطلعت واعتذرت ودلوقتي مش عايزين نوصل موضوع اخويا أحمد فتوح لكده ونرجع نقول بعد كده يا ريت كنا خفينا عليه.
وواصل في تصريحاته: فتوح غلط وقال أنا غلطت، مش لازم نتكلم ونقول لا إنت غلطان ونضغط عليه، أي راجل لما بيطلع يعتذر ويقول أنا غلط سامحوني دي حاجه كبيره جدا عند ربنا، والراجل طلع وقال أنا غلطان وعايز يروح لأهل الميت ربنا يرحمه يا رب ويصبر أهله وأولاده، مش كل شويه نطلع ونقول حسين إنت شتمت، حسين إنت غلط.
وأضاف: نفس الكلام فتوح مش كل شويه نطلع ونقول انت غلطان ادعي لفتوح ربنا يهديه ويسامحه ادعي لحسين ادعي لأي إنسان بيغلط، كل بني آدم خطاء وخير الخطائين التوابون، ربنا يهدينا جميعا ويسامح الجميع يا رب الدنيا مش مستاهلة.
