مي عمر: صورنا نعمة الأفوكاتو في قبر حقيقي.. ومحمد سامي مبيشُفش غير اللي هو عايزه في المشاهد
كشفت الفنانة مي عمر، تفاصيل وكواليس مشهد القبر في مسلسلها نعمة الأفوكاتو، الذي عُرض في السباق الرمضاني الماضي 2024، وحقق نجاحًا كبيرًا منذ عرض أولى حلقاته.
وقالت مي عمر، في ندوتها بالقاهرة 24: مسلسل نعمة الأفوكاتو كله اتصور في أماكن حقيقية ولا مرة دخلنا بلاتوه، وعملنا مشهد القبر في قبر حقيقي، ولكن كان فاضي ولسه جديد، فكرة نزول القبر وبيتقفل بجد عليا مع أن معايا كاميرات ولكن أول ما بيتقفل الدنيا بتبقى مظلمة خالص وأنا عندي فوبيا من الأماكن المغلقة والضيقة، وأول ما بيقفلوا القبر كنت بعيط ومش عارفة أصور، لغاية ما بدأت أمسك نفسي علشان أصور لأنه مشهد مهم جدًا، والموضوع كان إحساسه صعب.
وتابعت مي عمر: محمد سامي في المشاهد مبيشفش غير اللي هو عايزه، بيبقى عايز يطلع المشهد بشكل معين ومش هيسكت غير لما يطلع المشهد بالشكل اللي هو شايفه.
أما عن مسلسل نعمة الأفوكاتو، فسبق وتحدثت مي عمر، من خلال القاهرة 24، عن تفاصيله، قائلة: نعمة الأفوكاتو مسلسل اتكتب من الزيرو، وكنت بدور على فكرة لمسلسلي ومحمد سامي قالي على الفكرة أن واحدة بتكتشف أن جوزها بيخونها وبيقتلوها وبتطلع عايشة، وبدأ يكتب في الحلقات، واقترحت عليه نخلي الشخصية شعبية وبسيطة وقريبة من الناس.
مسلسل نعمة الأفوكاتو
وشارك في بطولة مسلسل نعمة الأفوكاتو، كل من: الفنان أحمد زاهر، أروى جودة، عماد زيادة، لبنى ونس، سلوى عثمان، ولاء الشريف، وعدد آخر من الفنانين، والعمل من تأليف مهاب طارق ومحمد سامي، والعمل من إخراج محمد سامي.
