مي عمر: المنافسة في رمضان صعبة.. وستات كتير بيعيشوا حالة نعمة الأفوكاتو
تحدثت الفنانة مي عمر، عن مسلسلها نعمة الأفوكاتو، والمنافسة في الموسم الرمضاني، بجانب الحديث عن رد فعل الجمهور على شخصية نعمة بالعمل والتي قدمتها للمرة الأولى.
وقالت مي عمر، في ندوتها بالقاهرة 24: المنافسة في رمضان بتبقى صعبة، بيبقى حواليكِ ممثلين ونجوم كبار ومهمين وقبلي بكتير وعاملين مسلسلات كتير، فببقى داخلة خايفة وبعمل مجهود كبير علشان أقدر أنافس.
وأردفت: نعمة الأفوكاتو مسلسل اتكتب من الزيرو، وكنت بدور على فكرة لمسلسلي، ومحمد سامي قالي على الفكرة أن واحدة بتكتشف أن جوزها بيخونها وبيقتلوها وبتطلع عايشة، وبدأ يكتب في الحلقات، واقترحت عليه نخلي الشخصية شعبية وبسيطة وقريبة من الناس.
وأضافت مي عمر: فعلًا كنت عايزة أعمل حاجة السنة دي مختلفة وكنت مراهنة على نعمة الأفوكاتو، وكان عندي خوف أن ممكن الناس متقبلش شكلها أو يبقوا مش متعودين عليا في الشكل ده، ولكن اللي حصل العكس والناس حابة ده ومبسوطة بيه، والنجاح ده إداني حماس أني أعمل مجهود أكبر في اللي جاي.
وعن تشابه شخصية نعمة الأفوكاتو مع الواقع، فعلقت مي عمر: لقيت ستات كتير جدًا بيقولولي أنهم زي نعمة، وواحدة قالتلي أن هي بتعيش نفس حالة نعمة بالظبط، وأن جوزها بياخد كل فلوسها ومش عايز يشتغل وهي اللي بتصرف على البيت، وأكتر حاجة ضحكتني أن في راجل بعتلي قالي أنا نعمة.
وواصلت: ونموذج شخصية جوز نعمة في المسلسل موجود كتير جدًا سواء في مصر أو برا، يعني البنات اللي بيجوا يشتغلوا من بلاد إفريقية أو آسيوية على سبيل المثال، بيجوا يشتغلوا هنا وسايبين ولادهم وبتبعت كل فلوسها للراجل علشان يصرف على الولاد، وبعد ما بترجع بلدها تلاقيه اتجوز بالفلوس دي.
