بعد نشر القاهرة 24.. مرسال تستجيب لصاحبة تريند الـ20 جنيها بتوفير فرصة عمل لها
أعلنت مؤسسة مرسال الخيرية، الاستجابة للسيدة زينب أحمد صاحبة تريند الـ 20 جنيها بالإسكندرية، مؤكدة توفير فرصة عمل لها.
مرسال تستجيب لزينب أم الطفلين
وقالت هبة راشد، رئيس مجلس الأمناء في مؤسسة مرسال للأعمال الخيرية والتنموية عبر حسابها الخاص على فيسبوك: شكرٍا جزيلا لكل الرسائل اللي جات بخصوص أستاذة زينب، إحنا وصلنا لها وهتعمل انترفيو معنا وربنا ييسر الأمور إن شاء الله.
وفي وقت سابق، تصدر فيديو لأم تعول طفلين بعد طلاقها تريند فيسبوك، وذلك بعدما تبرعت بآخر 20 جنيها معها للمحتاجين، رغم الديون والمسؤوليات التي تتحملها.
وقالت زينب أم الطفلين في تصريحات خاصة لـ القاهرة 24: المذيع قابلني بالصدفة وكل اللي طلباه إني أشتغل، عاوزة شغل بمرتب كويس، أنا منفصلة وبشتغل شغل مرتبه بسيط جدًا، وعندي ولد وبنت، وعاوزة مرتب عالي بشغل كويس عشان أصرف عليهم.
وأضافت: طليقي مش بيصرف ولا بيسأل، معرفش عنه حاجة، منفصلين من 3 سنين ومن ساعتها معرفش عنه حاجة.
وأكدت زينب: إياد عنده 12 سنة ونبيلة 8 سنين، مرتبي 1500 جنيه، وباخد سلف من قرايبي، ساكنة في الشقة الزوجية بتاعة حمايا إيجار قديم، أهل جوزي مش بيسألوا عليا، واخواته ميعرفوش عنه حاجة، أنا عايشة لوحدي مع ولادي، وأهلي في إسكندرية قاعدين لوحدهم، وولادي في مدارس حكومية.
وأردفت: لما قابلت المذيع قولت له أنا عاوزة وظيفة ثابتة بتعليمي، عاوزة أشتغل مش عاوزة مسابقة، نفسي في شغل بمرتب كويس، قالي: هسألك سؤال وجاوبي معانا وقولي إنك عاوزة شغل وفي ناس هتساعدك، وغيّر السؤال وحرجني لما قالي بنعمل مسابقة للغلابة كسفني جدا، ومش عاوزة أسبب إحراج لولادي، أنا عمري ما أستنيت حاجة من حد.
