بكالوريوس تجارة إنجلش ومش معايا تليفون.. محمد دفعته الظروف لجمع الكانز لكسب قوت يومه: بدور على شغل
بكالوريوس تجارة إنجلش ومش معايا تليفون.. محمد شاب في أوائل الثلاثين لجأ إلى جمع علب المشروبات الغازية من الشوارع لكسب قوت يومه بعد محاولاته اللامتناهية في العثور على فرصة عمل.
بكالوريوس تجارة إنجلش من جامعة القاهرة
ظهر محمد في فيديو على مواقع التواصل الاجتماعي استطاع من خلال حديثه في حصد كم هائل من التعليقات المتعاطفة معه، وقال محمد: أنا عندي 31 سنة معايا بكالوريوس تجارة إنجلش من جامعة القاهرة.
وعن عمله أوضح: أنك تسعى عشان تساعد نفسك ده مش عيب ربنا بيساعدك على تعبك ده، لكل مجتهد صيب.
رغم الظروف الصعبة التي تحيط محمد فإنه ظهر في الفيديو بوجه بشوش يروي جزءًا من المعاناة التي يعيشها يوميًا.
وأشار محمد: أنا بفتح الفيسبوك فين وفين عشان أدور على شغل، ومش معايا موبايل وبروح سايبر أفتح من عليه.
وأردف محمد: ديه مش حياتي لوحدي ديه حياة ناس كتير أنا حلمي إني اشتغل وأجيب تليفون، الغلا مش مخلي أي شاب قادر يتجوز، علشان تتجوز أنت عايز دهب وعايز شبكة وعايز شقة ودهب، أنا هجيب ده كله منين، هتجوز وأنزل أشحت بيها مثلا.
واختتم: فيه ناس بتقولي ربنا يعينك وفيه ناس بتتريق وتقولي روح اشتغل، هما فاكرين إن ده مش شغل، فاكرين اللي بيعمل كده اللي هو بيتسول، بس هو مش عيب في الظروف اللي إحنا فيها ديه مش عيب.
