ساعدوني أشوف ولادي.. أجنبية تستغيث من زوجها المصري
فوجئت امرأة أجنبية تحمل الجنسية البوسنية، بإقامة دعوى إسقاط حضانة من قِبل زوجها المصري، بعد زواج أنجبت خلاله ولدين، وأوضحت الزوجة أنها تستغيث وتطلب المساعدة لكي ترى أطفالها؛ لأن زوجها حجب أطفالها عنها نهائيًا بمصر، وسردت قصة زواجها وما تعرضت خلاله من أنواع العنف والخيانة، والتعامل معها بطريقة غير آدمية فخطف زوجها أطفالهم، واعتدى عليها بالضرب المُبرح.
استغاثة سيدة أجنبية من زوجها المصري
قال الزوجة: أنا جنسيتي بوسنية، أنا وأحمد.ع كنا متزوجين في البوسنة، وقبل الزواج مكناش نعرف بعض وكان كله كلام على النت، وبعد الزواج بشهرين نزلنا الكويت لإن شغله كان بالكويت، وأنا كنت عايشة مع أهله، وأول سنة زواج كانت حلوة، ولكن بعد كدا حصل مشاكل وزوجي كان كل شوية بيزعقلي، وبدأت أحس إن فيه حاجة غلط، ولقيته بيكلم بنات، وعشان كنت بحبه فكنت صابرة.
حينما دخل ابني المدرسة بدأ زوجي ينهرني ويضرني
وأكملت: ولما كنت في الكويت كان أهلي بعيد عني فكنت بضطر ألجأ لأهله بس مكنوش يصدقوني، وبعدين أنا حملت في عمر، ونزلت البوسنة عشان أخلف هناك، وأنا وزوجي كنا عايشين شوية في الكويت وشوية في البوسنة لإن هو كان بيحبها أوي، وفي سنة 2021 أنا دخّلت عمر مدرسة، وفي الوقت ده كان أحمد بدأ يزعقلي ويبقى فيه مشاكل وكان بيضربني وأقعد أصرخ.
وأضافت: خد مني جوازات البوسنة بتاعت الأطفال وقالي انتي عايزة تسافري براحتك، ولو اتكلمتي كتير هاخد عيالك منك خالص، كان دايما بيهددني ويقولي حياتك هتبقى سودة، وسافرت البوسنة بس كنت عايزة أرجع عشان أبقى جنب أولادي وعشان أطلق، بس هو قال قدام المحكمة إنه هيتغير وهيشوف شقة جديدة لإنه كان معيشني في شقة وحشة جدا مع أهله وكنت صابرة.
السيدة الأجنبية: لم أرَ أولادي منذ عام
وأردفت: شوفنا شقة فعلًا بس كان بيضربني برضه ومكنش فيه أي حاجة بتعجبه خالص، دخلت في حالة صعبة وكنت بعيط بس، وبعدين شوفت صوره مع بنت وكنت زعلانة جدا، ولما كنت بشتكي لأهله أمه كانت بتزعقلي، ولما خلفت كان يزعقلي عشان مش عايز أطفال، وقالي لو طلبتي الطلاق مش هتشوفي أولادك تاني ولا حتى كاميرا، ولكن أنا روحت طلبت الطلاق في 2023، ومن ساعتها آخر مرة شوفت أطفالي في الكاميرا السنة اللي فاتت وأهله عاملين ليا بلوك وهو مبيردش عليا ومبقتش عارفة أشوف أطفالي.
