فتاة تستغيث من نقص أدوية السكري: مفيش علاج في الصيدليات ومش لاقيه البدائل
استغاثت فتاة تدعى رنيم سلامة، من نقص أدوية السكر في الصيدليات، حيث أنها تعاني من مرض السكري منذ الطفولة، واعتادت طبيعة جسمها على نوع معين من أدوية السكر، ولكن أصبح غير متوفر في الصيدليات خلال الأشهر القليلة الماضية، مما اضطرها للجوء لعلاج بديل، ولكن بعد فترة أصبح البديل أيضًا غير متوفر بالأسواق.
فتاة تستغيث من نقص أدوية علاج السكري
وقالت رنيم سلامة، في مقطع فيديو لها عبر حسابها الشخصي بموقع التواصل الاجتماعي تيك توك، الفيديو ده حياة أو موت يمكن أكتر فيديو مهم على صفحتي، لأني هتكلم فيه عن كارثة، علاج السكر بتاعي مش متوفر في ولا صيدلية لدرجة أن أكبر الصيدليات وأشهرها مش متوفر فيها، يعني إيه أكبر صيدلية في المحافظة اللي أنا فيها وفي منها فرع في كل محافظة تانية مش موجود فيها علاج السكر بتاعي.
وتابعت: عندي السكر من وأنا عندي 9 سنين، المفروض أنا عندي مرض مزمن لحد ما أموت، المرض دا معايا طول الحياة، باخدله علاج عشان أعرف اكمل يومي، علاج معين جسمي متعود عليه بقالي أكتر من 10 سنين، طيب لما فجأة من سنتين العلاج دا أول ما نقص من السوق وهو الاكتربد، روحت لتأمين الجامعة لأنه أنا بصرف علاجي من تأمين الجامعة.
وأضافت: قالولي في تأمين الجامعة إن العلاج مش متوفر وادوني البديل له وهو روڤو راب، ومكنتش أعرفه ولا استخدمته قبل كدا، واستخدمته وعودت نفسي عليه لمدة سنة، وخلاص جسمي اتعود عليه، ورايحه أسأل عليه قالولي إنه بردو مش موجود، هترجعي تاني للاكتربد، رجعت تاني، شهرين بالظبط واختفى تاني من السوق.
واستكملت: قالوا هتاخدي حاجة اسمها إبدرا، ودي منفعتش معايا نهائيا، كان جسمي مش متقبلها أبدا طول اليوم سكري عالي، اللي عنده السكر هيعرف أنا بقول إيه، وفضلت أكتر من شهرين متبهدلة على الوضع ده، وفضلت احاول أعود جسمي عليه مش عارفة، رحت عشان أصرف الإبدرا ملقتهوش موجود، وتم وصف بديل آخر، ولكنه تسبب في مضاعفات خطرة، منها زيادة ضربات القلب، لذا أنا بطالب بتوفير أدوية السكري.
