شيكابالا: كنت واثق من الفوز بالسوبر الإفريقي.. والناس قبل الماتش مكنتش مصدقانا
عبر محمود عبد الرازق شيكابالا لاعب فريق الزمالك، عن سعادته بعد تتويج الأبيض بلقب السوبر الإفريقي، على حساب الأهلي.
وفاز الزمالك على نظيره الأهلي في السوبر الإفريقي بركلات الترجيح بنتيجة 4-3، بعد نهاية الوقت الأصلي بالتعادل الإيجابي بهدف لمثله.
تصريحات شيكابالا
وقال محمود عبد الرازق شيكابالا في تصريحات تليفزيونية: الحمد لله على هذا اللقب، والناس قبل الماتش مكنتش مصدقانا، وده كان دافع لينا.
وأضاف شيكابالا: الواحد مننا بـ 20 منكم، والزمالك كبير أوي، وعملت فيديو قبل الماتش ووريته لـ اللاعبين وقولت لهم شوفوا الناس بتقول عليكم إيه.
وأكمل شيكابالا: رشح الفائز زي ما أنت عايز، بس لا تقلل من نادي الزمالك، لأن نادي الزمالك كبير على أي حد.
وزاد: إحنا كنا مصدقين نفسنا أوي قبل اللقاء، وقفلنا على بعض، وقولنا لازم نفوز في المباراة دي، والجماهير دي كانت جيا ومصدقانا.
وواصل شيكابالا: اللعيبة قبل الماتش عيطت لما شافت 600 واحد من جماهير الزمالك في غرفة واحدة، جيين يساندونا.
وأردف شيكابالا: كنت عارف لاعيبتي كويس وكنت واثق من الفوز، وإيمانويل أديبايور طلع زملكاوي واحتفلنا مع بعض بعد اللقاء.
واختتم شيكابالا تصريحاته قائلا: الناس انتقدت ناصر منسي كتير الفترة اللي فاتت، وقلت له أن دي فرصتك، وناصر جاب التألق والجون لأنه كان قاعد في نفس الدور مع كريستيانو رونالدو في الفندق، ونادي النصر كان قاعد معانا.
