خالد الجندي عن السحر: الدول بتدمر بالريموت وإحنا لسه مؤمنين بشمهورش
أكد الشيخ خالد الجندي، عضو المجلس الأعلى للشئون الإسلامية، أن الأمة الإسلامية تواجه أزمة حقيقية تتعلق بموضوع السحر، لافتا إلى أن الأمر أصبح شائعًا بين الناس على الرغم من كونه أحد الأمور التي تم نفيها في النصوص الشرعية.
خالد الجندي عن أزمة السحر
وقال عضو المجلس الأعلى للشئون الإسلامية، خلال تصريحات تليفزيونية: تخيل يقولك أصل في سحر يا ابني، السحر كان موجود قبل النبي وانتهى، مفيش فايدة الشيخ فلان والشيخ علان قالوا إن في سحر، ويظهر أن الناس عندهم حالة هبل بسبب السحر، حالة واستشرت بين الناس بسبب فتاوى السحر التي ما أنزل الله بها من سلطان.
وأضاف: يا جماعة، حد يقول لي: السحر موجود فين؟ وعنوانه إيه؟ ومين؟ وفين الكلام ده؟ والسحرة ما بيدافعوش عن نفسهم ليه؟ إذا كنت أنا واحد مثل حالتي كده وبعض العقلاء يقولون إنه ما فيش سحر، طيب سحرونا! طب عطلونا عن حياتنا! اعملوا لنا أي سحر، لكن لأنهم نصابين وكذابين بيحاولوا يدلسوا على الناس.
وواصل: تخيل حضرتك الأزمة اللي إحنا عايشينها بجد، يعني هي متصلة بموضوع الإعداد والمنهج العلمي، اللي بنتكلم فيه، الدولة انتصرت في 73 بسبب الإعداد، يعني الفخر اللي جناه بسبب الإعداد والمنهج العلمي، في الوقت اللي إحنا شايفين فيه اللي ما عدوش حصل لهم أي شيء، في نفس الوقت يا محترم، اللي شايفين فيه الصهاينة شغالين بالريموت كنترول، بيدمروا قادة الدول وبيدمروا أسلحة ويهدوا جيوش، بماذا؟ بالأجهزة الإلكترونية، بالريموت كنترول.
واختتم: الانتصار، ما بقاش بالتحام جيوش، لا يا حج، الانتصار بقى بالعلم والبحث العلمي والتكنولوجيا والبرمجة الإلكترونية والذكاء الاصطناعي، إحنا لسه عايشين مع شمهورش، لسه مؤمنين بعفروتو.. الكلام اللي إحنا فيه ده مأساة.
